ގެސްޓްހައުސް އިމާރާތް ކުރުމަށް އިތުރު ރަހުނަކާ ނުލައި މިހާރު ލޯނު ލިބޭނެ ކަމަށް ބީއެމްއެލްގެ ސީއީއޯ މުހައްމަދު ޝަރީފް ވިދާޅުވެއްޖެއެވެ.
ށ. ގޮއިދޫގައީ ބީއެމްއެލްގެ އޭޓީއެމްގެ ޚިދުމަތް ފެށުމަށް މިއަދު ބޭއްވި ރަސްމިއްޔާތުގައި ޝަރީފް ވިދާޅުވީ ގޮއިދޫއަކީ ގެސްޓްހައުސްގެ ވިޔަފާރި ފަށަމުން އަންނަ ރަށެއް ކަމަށްވާއިރު، އެ ލޯނަކީ އެ ރަށު ރައްޔިތުންނަށް ވަރަށް ބޭނުންތެރިއެއްޗެއް ކަމަށެވެ.
މީގެއިތުރުން ގެދޮރު ބިނާކުރުމަށް ވެސް ވަކި ވަރަކަށް ރަހުނަކާނުލައި ލޯނު ލިބޭނެގޮތް ފަހިކޮށްދީފައިވާނެ ކަމަށް އޭނާ ވިދާޅުވިއެވެ.
ގޮއިދޫގެ އިތުރުން އެއަތޮޅު ފޭދު އާއި ނޫމަރާގައި ވެސް މިއަދު ވަނީ އޭޓީއެމްގެ ޚިދުމަތް ފަށާފައެވެ.
ގޮއިދޫގައި ޤާއިމުކޮށްފައިވަނީ 24 ގަޑިއިރު ފައިސާ ނެގުމާއި ޖަމާކުރުމުގެ ޚިދުމަތް ލިބޭ ސެލްފް ސާވިސް އޭޓީއެމެކެވެ. ށ އަތޮޅުގެ ހުރިހާ ރަށެއްގައި އޭޓީއެމް ޚިދުމަތް ފެށުމުގެ ގޮތުން މި ބުރުގައި 10 ރަށެއްގައި ޚިދުމަތް ފެށުމަށް ވަނީ ހަމަޖެހިފައެވެ. މާދަމާގެ ނިޔަލަށް އެ އަތޮޅުގެ ހުރިހާ ރަށެއްގައި އޭޓީއެމްގެ ޚިދުމަތް ލިބޭނެއެވެ.
ކިޔުންތެރިންގެ ހިޔާލު