ކުދި އަދި މެދު ފަންތީގެ ވިޔަފާރިތައް ކުރިއެރުވުމަށް މިދިޔަ އަހަރު 2.78 ބިލިއަން ރުފިޔާ ދޫކޮށްފައިވާކަމަށް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ)އިން ހާމަކޮށްފިއެވެ.

އެސްޑީއެފްސީއަކީ އެންމެ ކުދި ވިޔަފާރިތަކާއި ކުދި އަދި މެދުފަންތީގެ ވިޔަފާރިތައް އަލަށް ފެށުމަށާއި، ހިނގަމުންދާ ވިޔަފާރިތައް ދެމެހެއްޓެނިވި ގޮތެއްގައި ކުރިއަށް ގެންދިއުމަށް އަދި ވިޔަފާރިތައް އިތުރަށް ތަރައްޤީކޮށް ފުޅާކުރުމަށް ބޭނުންވާ މާލީ އެހިތެރިކަން ފޯރުކޮށްދިނުމުގެ މަޤްޞަދުގައި 2019 ވަނަ އަހަރު ސަރުކާރުން އުފައްދާފައިވާ މާލީ އިދާރާއެކެވެ.

އެސްޑީއެފްސީގެ 6 ވަނަ އަހަރީ އާންމު ޖަލްސާގައި ހާމަކޮށްފައިވަނީ މިދިޔަ އަހަރު އެ ކޯޕަރޭޝަނުން ކެޕިޓަލް ލޯނުގެ ގޮތުގައި 1.736 ބިލިއަން ރުފިޔާ ދޫކޮށްފައިވާ ކަމަށެވެ. އަދި ސަރުކާރުގެ އެކި އިދާރާތަކާ ގުޅިގެން އެ އިދާރާއިން ކުރިޔަށް ގެންދާ އެޑްމިނިސްޓަރޑް ލޯނުތަކަށް 1.045 ބިލިއަން ރުފިޔާ ވަނީ ދޫކޮށްފައެވެ.

އެގޮތުން މިހާތަނަށް އެންމެ ގިނަ ލޯނު ދޫކޮށްފައިވަނީ ފަތުރުވެރިކަމުގެ ދާއިރާއަށެވެ. އެއީ 521 މިލިއަން ރުފިޔާއެވެ. ދެވަނައަށް އެންމެ ގިނަ ލޯނު ދޫކޮށްފައިވަނީ ކޮމާރސް ދާއިރާއިންނެވެ. އެއީ 509.9 މިލިއަން ރުފިޔާއެވެ.

މީގެ އިތުރުން، ސަރުކާރުގެ އިދާރާތަކާ ގުޅިގެން އެންމެ ގިނަ ލޯނު ދޫކޮށްފައިވަނީ މަސްވެރިކަމުގެ ސިނާއަތަށެވެ. އެދާއިރާއިން 647 މިލިއަން ރުފިޔާ ވަނީ ދޫކޮށްފައެވެ.

އަދި މިދިޔަ އަހަރު ނިމުނުއިރު ސަރުކާރުގެ އެހެން އިދާރާތަކާ ގުޅިގެން ދޫކޮށްފައިވާ ލޯނުތަކުގެ 44 އިންސައްތައަކީ އަތޮޅުތެރެއަށް ދޫކޮށްފައިވާ ލޯނުތައްކަމަށް ވެސް އެ އިދާރާގެ ތަފާސް ހިސާބުތަކުން ދައްކައެވެ. އެއީ 1.13 ބިލިއަން ރުފިޔާއެވެ.