ވެރިކަން ބަދަލުވާ ކޮންމެ ފަހަރަކު ސުޕްރީމް ކޯޓުގެ ފަނޑިޔާރުން ބަދަލުކުރުމަކީ ވަރަށް ބޮޑު ގޯހެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު އެކްސްގައި މިއަދު ކުރެއްވި ޕޯސްޓެއްގައި އެހެން ވިދާޅުވެފައިވަނީ، ޖުޑީޝަލް ސާވިސް ކޮމިޝަން (ޖޭއެސްސީ) އިން ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު މަހާޒް އަލީ ޒާހިރުގެ ސުލޫކީ މައްސަލައެއް ބަލައި، ފަނޑިޔާރުކަމުން އެ ދެ ބޭފުޅުން ވަކިކުރުމަށް ފޮނުވުމުން، މިއަދު ރައްޔިތުން މަޖިލީހުގެ ޖަލްސާގައި އަޒްމިރަލްދާ އާއި މަހާޒް ފަނޑިޔާރުކަމުން ވަކިކުރުމަށް ފާސްކުރުމާ ގުޅިގެންނެވެ.
ނަޝީދު ވިދާޅުވީ ގާނޫނުއަސާސީ ބައްޓަންކޮށްފައި މިވަނީ އުންމީދުކުރި ގޮތާ ހިލާފަށް ރަސްކަމެއް ފަދަ ރިޔާސީ ނިޒާމެއް ކަމަށާއި 2008 ގައި އާ ގާނޫނުއަސާސީއަށް އަމަލުކުރަން ފެށުމާއެކު ސުޕްރީމް ކޯޓު އެކުލަވާލަން ޖެހުނު ކަމަށެވެ. އަދި ވެރިކަން ބަދަލުވާ ކޮންމެ ފަހަރަކު ފަނޑިޔާރުން ބަދަލުކުރަން ޖެހޭ ކަމަށް އާ ވެރިންގެ ހިތަށް ވަންނަކަމީ ވަރަށް ބޮޑު ދެރައެއް ކަމަށް އެ މަނިކުފާނު ވިދާޅުވިއެވެ.
ރިޔާސީ އިންތިހާބު 2013، 2018 އަދި 2023 އަށްފަހުގައި ކޮންމެ ވެރިކަމަކުން ވެސް މިވަނީ ފަނޑިޔާރުން ބަދަލުކޮށްފައި ކަމަށާއި އެއީ ވަރަށް ބޮޑު ދެރައެއް އަދި ގޯހެއް ކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ ރައީސުލްޖުމްހޫރިއްޔާ ބޭނުންފުޅުވާއިރަށް ފަނޑިޔާރުން ބަދަލުކުރުމަކީ ފެހި ގާނޫނުއަސާސީ ތަސައްވަރުކުރި ގޮތެއް ނޫން ކަމަށާއި އެހެން ނުވާނެ ގޮތަކަށް ނިޒާމު ބަދަލުކުރަން ޖެހޭ ކަމަށެވެ.
ޖޭއެސްސީން ދެ ފަނޑިޔާރުންގެ ސުލޫކީ މައްސަލަ ބަލާފައިވަނީ، ފަނޑިޔާރު އަޒްމިރަލްދާގެ ފިރިކަލުން، އައިޖީއެމްއެޗްގެ ޑޮކްޓަރު އިސްމާއިލް ލަތީފުގެ މައްޗަށް ތުހުމަތުކުރާ މައްސަލައެއްގައި ކްރިމިނަލް ކޯޓުން އޭނާ ބަންދުކުރުމުން އޭނާ ދޫކޮށްލަން ނުފޫޒު ފޯރުވި ކަމަށް ތުހުމަތުކޮށެވެ.
ކިޔުންތެރިންގެ ހިޔާލު