ގދ. ނަޑެއްލާ އިން ގެއްލިގެން ހޯދަމުންދިޔަ މީހާ، ފަޅުރަށަކުން ފެނިއްޖެއެވެ.
ގެއްލިގެން ހޯދަމުންދިޔައީ ހދ. ނޮޅިވަރަމް/ ސުހާނީ، އާދަމް އިބްރާހިމް (34އ) އެވެ.
ފުލުހުން މީގެ ކުރިން ބުނެފައިވަނީ، އިއްޔެ މެންދުރުފަހު 2:00 ހާއިރު ނަޑައްލާއަށް ކައިރިކުރި “އިތުބާރު” ނަމަކަށް ކިޔާ ދޯނިން އެ ރަށަށް އާދަމް އިބްރާހިމް ފޭބުމަށްފަހު އެނބުރި ދޯންޏަށް އައިސްފައިނުވާ ކަމަށެވެ. އަދި އޭނާގެ އެއްވެސް ހަބަރެއް ނުވެގެން އެ މައްސަލަ ފުލުހުންނަށް ރިޕޯޓް ކުރީ ރޭ 10:25 އެހާކަންހާއިރު ކަމަށް ބުނެފައިވެއެވެ.
ފުލުހުން މިއަދު ބުނީ ނަޑެއްލާއިން ގެއްލިގެން ފުލުހުންނަށް ރިޕޯޓްކުރުމާ ގުޅިގެން ހޯދަމުންދިޔަ އާދަމް އިބްރާހިމް ފެނިފައިވާ ކަމަށާއި އޭނާ ފެނިފައިވަނީ މިއަދު ހަވީރު 4:45 ހާއިރު ނަޑެއްލާ ކައިރީ އޮންނަ ފަޅުރަށަކުން ކަމަށެވެ. އަދި އޭނާގެ ހާލު ރަނގަޅު ކަމަށް ފުލުހުން ބުންޏެވެ.
އޭނާ ފެނިފައި ވަނީ ފުލުހުންނާއި ނަޑެއްލާގެ ރައްޔިތުންގެ ޓީމަކަށް ކަމަށާއި ކޯސްޓްގާޑުން ވެސް މީހާ ހޯދުމުގެ މަސައްކަތުގައި މިއަދު ހެނދުނުން ފެށިގެން ހަރަކާތްތެރިވެފައިވާ ކަމަށް ފުލުހުން ބުންޏެވެ.
ފުލުހުން ބުނީ މީހާ ހޯދުމުގެ ގޮތުން ނަޑެއްލާ ފަޅު ތެރެއިން ދިހަ ފަޅުރަށް ބެލިފައިވާ ކަމަށާއި ނަޑެއްލާގެ އެކި ސަރަހައްދުތައްވެސް ބަލައި ފާސްކޮށްފައިވާ ކަމަށެވެ. އަދި އާދަމް އިބްރާހީމް ގެއްލިފައިވާ މައްސަލައިގައި އިތުރަށް ބަލަންޖެހޭ ކަންތައްތަކެއް ހުރުމުން ތަހުގީގު ކުރުމުގެ މަސައްކަތްކުރަމުން އަންނަ ކަމަށް ފުލުހުން ބުންޏެވެ.
