މި ސީޒަނުގެ ފްރެންޗް ލީގުގެ އެންމެ މޮޅު ކުޅުންތެރިޔާގެ މަގާމަށް ޕެރިސް ސެއިންޓް-ޖަރމޭން (ޕީއެސްޖީ) ގެ ފޯވާޑް އޮސްމާން ޑެމްބެލޭ ހޮވިއްޖެއެވެ.
މި ސީޒަނުގައި ފްރެންޗް ލީގުގެ 28 މެޗުން 21 ލަނޑު ޖަހައި، ޕީއެސްޖީއަށް ލީގު ޗެމްޕިއަންކަން ހޯދައިދިނުމުގައި ޑެމްބެލޭގެ ދައުރު ފާހަގަކޮށްލެވެއެވެ. މުޅި ސީޒަނުގައި މިހާތަނަށް އޭނާ ވަނީ 46 މެޗުން 33 ލަނޑު ޖަހާފައެވެފައެވެ.
ބާސެލޯނާއިން ޕީއެސްޖީއަށް ބަދަލުވުމަށްފަހު، ޑެމްބެލޭ ވަނީ މި ސީޒަނުގައި ފްރެންޗް ކަޕް ހޯދައިދީ، އަދި ޔުއެފާ ޗެމްޕިއަންސް ލީގުގެ ފައިނަލަށް ޓީމު ކޮލިފައިކޮށްދީފައެވެ.
“މިފަދަ ކޮންމެ އެވޯޑަކީ އަޅުގަނޑުގެ ކުޅުން އިތުރަށް ތަރައްޤީކުރުމަށް ލިބޭ ހިތްވަރެކެވެ. އަޅުގަނޑުގެ އަމާޒަކީ އަބަދުވެސް ޓީމަށް ކާމިޔާބު ހޯދައިދިނުމެވެ. މި ކާމިޔާބީގައި ޓީމުގެ ކޮންމެ ކުޅުންތެރިއެއްގެ، ކޯޗުގެ އަދި ސަޕޯޓް ސްޓާފުގެ ހިއްސާ އެކުލެވިގެންވެއެވެ،” ޑެމްބެލޭ ވިދާޅުވިއެވެ.
ޑެމްބެލޭ ވިދާޅުވީ ފްރެންޗް ލީގާއި ފްރެންޗް ކަޕް ކާމިޔާބުކުރުމަށްފަހުވެސް، ޕީއެސްޖީގެ މައިގަނޑު އަމާޒަކީ ޗެމްޕިއަންސް ލީގު ކަމަށެވެ. އެގޮތުން، ފައިނަލުގައި އިންޓަރ މިލާން ބަލިކުރުމަށް ކުޅުންތެރިން ދަނީ ފުރިހަމައަށް ތައްޔާރުވަމުން ކަމަށްވެސް އޭނާ ހާމަކުރެއްވިއެވެ.
ޕީއެސްޖީގެ ކޯޗު ލުއިސް އެންރީކޭ ވިދާޅުވީ ޑެމްބެލޭގެ ކުޅުމުގައި ފާހަގަކުރެވޭ ކުރިއެރުމެއް އައިސްފައިވާ ކަމަށެވެ. އެންރީކޭ އަކީ ލީގުގެ އެންމެ މޮޅު ކޯޗުގެ މަގާމު ހޯއްދެވި ބޭފުޅެކެވެ. އަދި އެންމެ މޮޅު ގޯލްކީޕަރުގެ މަގާމަށް ހޮވުނީ ޕީއެސްޖީގެ އިޓަލީ ގޯލްކީޕަރު ޖިއަންލުއިޖީ ޑޮންނަރޫމާއެވެ.
