އިންޑިއާ އާއި ޕާކިސްތާނުގެ މެދުގައި ހިނގަމުންދިޔަ ހަނގުރާމަ ވަގުތުން ހުއްޓާލުމަށް އެ ދެ ޤައުމުން އެއްބަސްވުމާ ގުޅިގެން ދިވެހިރާއްޖެއިން މަރުހަބާ ކިޔައިފިއެވެ.
މިކަމާ ގުޅޭގޮތުން ރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލް އެކްސްގައި ކުރެއްވި ޕޯސްޓެއްގައި ވިދާޅުވީ އިންޑިއާ އާއި ޕާކިސްތާނުގެ މެދުގައި ވަގުތުން ހަނގުރާމަ ހުއްޓާލުމަށް އިޢުލާނުކުރި ކުރުމަށް މަރުޙަބާ ވިދާޅުވާ ކަމަށެވެ. އަދި އެ ދެ ޤައުމުގެ ވެރިންނަށް ސުލްޙައާއި ޑައިލޮގްގެ މަގު ޚިޔާރުކުރުމަށްޓަކައި، އަދި ސަރަޙައްދީ ހަމަޖެހުން ޤާއިމުކުރުމަށް ފިޔަވަޅުތަކެއް އެޅުއްވި ކަމަށްޓަކައި ޚަލީލު ވަނީ ތަޢުރީފު ކުރައްވާފައެވެ.
I welcome the announcement of an immediate ceasefire between #India and #Pakistan. We commend the leadership of both countries for choosing the path of peace & dialogue, and for taking steps towards regional stability.
— Abdulla Khaleel (@abkhaleel) May 10, 2025
އިންޑިއާއިން ކޮންޓްރޯލް ކުރާ ކަޝްމީރުގެ ސަރަހައްދުގެ ތެރޭގައި މިދިޔަ މަހުގެ 22 ވަނަ ދުވަހު ފަތުރުވެރިންތަކަކަށް ހަމަލާދީ މަރާލުމާ ގުޅިގެން ޕާކިސްތާނާއި އިންޑިޔާގެ މަޝްރަޙު ވަރަށް ބޮޑަށް ގޯސްވެ ދެ ގައުމުން ވަނީ ހަނގުރާމަ ފަށާފައެވެ. އިންޑިޔާ އިން ދިން މިސައިލް ހަމަލާތަކަށް ރައްދު ދިނުމަށް ޕާކިސްތާނުން ވަރުގަދަ ހަމަލާތަކެއް އިންޑިއާއިން ކޮންޓްރޯލް ކުރާ ކަޝްމީރު ސަރަހައްދަށް ވަނީ ދީފައެވެ. މިހަމަލާ ބަދަލުކުރުން ތަކުގައި ދެގައުމުން ވެސް ވަނީ އެތަށް ބަޔަކު މަރުވެފައެވެ.
އިންޑިޔާ އާއި ޕާކިސްތާން ހޮނިހިރު ދުވަހު ހަނގުރާމަ ހުއްޓާލަން އެއްބަސްވެފައިވާ ކަން ހާމަކުރެއްވީ އެމެރިކާގެ ރައީސް ޑޮނަލްޑް ޓްރަމްޕެވެ.
“އެމެރިކާ މެދުވެރިވެ ދިގު ރެއެއްގެ މަޝްވަރާތަކަކަށްފަހު، އިންޑިޔާ އާއި ޕާކިސްތާން ފުރިހަމަ އަދި ވަގުތުން ހަނގުރާމަ ހުއްޓާލުމަށް އެއްބަސްވެއްޖެކަން އިޢުލާނުކުރުމަށް އަހަރެން އުފާކުރަމެވެ،” ޓްރަމްޕް ކުރެއްވި ޕޯސްޓެއްގައި ވިދާޅުވިއެވެ.
ކިޔުންތެރިންގެ ހިޔާލު