ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާ ގޮތުގައި، ތަޙުޤީޤަށް ހައްޔަރުކޮށްފައިވާ މީހުންގެ ތެރެއިން މަދުވެގެން ތިންބައިކުޅަ އެއްބައި މީހުންނަކީ އިލެކްޓްރޯނިކް މޮނިޓަރިންގ ނިޒާމެއްގެ ދަށުން ދޫކޮށްލެވިދާނެ ފަރާތްތަކެއްތޯ ބެލުމަށް ކަމާބެހޭ އިދާރާތަކާ ޙަވާލުކުރައްވާފައިވެއެވެ.
“ރައްޔިތުންނާ އެކު” ޕޮޑްކާސްޓްގެ އެޕިސޯޑެއްގައި ރައީސުލްޖުމްހޫރިއްޔާ ވިދާޅުވެުވެފައިވަނީ، “ވާނުވާ ބަންދު”ގެ މައްސަލައަށް އެންމެ އެކަށީގެންވާ ދާއިމީ ޙައްލަކީ މައްސަލަތައް އަވަހަށް ބަލައި ނިންމުން ކަމަށެވެ. އަދި މިކަމަށް ބޭނުންވާ އެހީތެރިކަން ސަރުކާރުން ފޯރުކޮށްދެއްވާނެ ކަމުގެ ޔަޤީންކަންވެސް ދެއްވާފައިވެއެވެ.
މިހާރު 300 އަށްވުރެ ގިނަ މީހުން “ވާނުވާ ބަންދު”ގައި ތިބިއިރު، އޭގެ ތެރޭގައި 6 އަހަރަށްވުރެ ގިނަ ދުވަހު ބަންދުގައި ތިބި މީހުންވެސް ހިމެނޭކަން ރައީސުލްޖުމްހޫރިއްޔާ ފާހަގަކުރައްވައި، މިއީ ވަރަށް ބޮޑު މައްސަލައެއް ކަމަށް ވިދާޅުވެފައިވެއެވެ.
ދިވެހިރާއްޖޭގައި ފުރިހަމަ ކަފާލާތުގެ ނިޒާމެއް ޤާއިމުކުރުމަށް ރައީސުލްޖުމްހޫރިއްޔާގެ މެނިފެސްޓޯގައި ޚާއްޞަ އަހައްމިއްޔަތުކަމެއް ދެއްވާފައިވާއިރު، މިހާރު ކަފާލާތު ލިބުމަށް އޮތީ ހަނި ފުރުޞަތެއްކަން ފާހަގަކުރައްވައި، މި މައްސަލައަށް ފުރިހަމަ ޙައްލެއް ހޯދުމަށް ޤާނޫނީ މަސައްކަތްތައް ކުރިއަށްދާ ކަމަށް ވިދާޅުވެފައިވެއެވެ.
