ރާއްޖޭގައި ތިބި 74 އިންޑިއާ ސިފައިން އަނބުރާ ގައުމަށް ފޮނުވާލާފައިވާނެ ކަމަށާއި ރާއްޖޭގައި އެ ސިފައިން އެއްވެސް ހަތިޔާރެއް ގެންގުޅެފައިނުވާ ކަމަށް ޑިފެންސް މިނިސްޓަރު ގައްސާން މައުމޫން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުންގެ ސުވާލުތަކަށް ޖަވާބުދެއްވަމުން ގައްސާން ވިދާޅުވީ ރާއްޖޭގައި އޭރު ހަރަކާތްތެރިވި އިންޑިއާ ސިފައިން އެއްވެސް ހަތިޔާރެއް ގެންގުޅެފައި ނުވާ ކަމަށެވެ.
އިންޑިއާގެ 74 ސިފައިން އޭރު ރާއްޖޭގައި ތިބި ކަމަށާއި ނަމަވެސް އިންޑިއާ ސަރުކާރުން އެ އެންމެން އަނބުރާ ގެންގޮސްފައިވާ ކަމަށް މިނިސްޓަރު ވިދާޅުވެއްޖެއެވެ.
މިނިސްޓަރު ވަނީ އިންޑިއާ ސިފައިން ރާއްޖެ ދޫކޮށްދިޔަ ތާރީހުތަކާއި ދުވަސްތަކުގެ ތަފްސީލު ވެސް ދެއްވައިފައެވެ. އެގޮތުން ހަ ދުވަހެއްގެ މަތިން އެކި އަދަދުތަކަށް މިދިޔަ އަހަރު އިންޑިއާ ސިފައިން ފޮނުވާލެވުނު ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، އެ ހުރިހާ ސިފައިން އިންޑިއާއިން އަނބުރާ ގެންދިޔައީ، ދެގައުމުގެ ދެމަދުގައި އޮތް ގާތް ގުޅުމުގެ ތެރެއިން ކަމަށާއި މިހާރު އެއްވެސް ގައުމެއްގެ އަސްކަރިއްޔާއެއް ރާއްޖޭގައި ނޯންނާނެ ކަމަށެވެ.
