ސިންގަޕޫރުގެ ވެރިކަން ކުރާ ޕީޕަލްސް އެކްޝަން ޕާޓީ (ޕީއޭޕީ) އިން ވިދިވިދިގެން 14 ވަނަ ޢާންމު އިންތިޚާބު ކާމިޔާބުކޮށް، ދިގު މުއްދަތަކަށް ދެމިގެން ގޮސްފައިވާ އެ ޕާޓީގެ ވެރިކަން ދަމަހައްޓައިފިއެވެ. ވިޔަފާރިއަށް ބަރޯސާވެފައިވާ ސިންގަޕޫރުގެ އިންތިޚާބު ޕީއޭޕީން ކާމިޔާބު ކޮށްފައި މިވަނީ، ދުނިޔޭގައި އިޤްތިޞާދީ ގޮންޖެހުންތަކެއް ކުރިމަތިވެ، ބާޒާރުތަކަށް ބޮޑެތި ލޮޅުންތަކެއް އަންނަމުންދާ ދަނޑިވަޅެއްގައެވެ.

1965 ވަނަ އަހަރު ސިންގަޕޫރަށް މިނިވަންކަން ލިބުނު އިރުވެސް އެ ޤައުމުގައި ވެރިކަން ކުރަމުން ދިޔައީ ޕީއޭޕީންނެވެ. އެ ޕާޓީން އިންތިޚާބު ކާމިޔާބު ކޮށްފައި ވަނީ ޤާނޫނު ހަދާ މަޖިލީހުގައި އިންތިޚާބަށް ހުޅުވާލާފައިވާ 97 ގޮނޑީގެ ތެރެއިން 87 ދާއިރާއިން ކާމިޔާބީ ހޯދައިގެންނެވެ. އޭގެ ތެރެއިން 33 ދާއިރާއަކުން ޕީއޭޕީ ވަނީ ބޮޑު އަޣުލަބިއްޔަތެއް ކާމިޔާބު ކޮށްފައެވެ. މިއީ، އެންމެ ފަހުން ބޭއްވި އިންތިޚާބުގައި އިދިކޮޅު ޕާޓީން ބޮޑެތި ކުރިއެރުންތަކެއް ހޯދާފައިވާ ދާއިރާތަކެކެވެ.

ސިންގަޕޫރުގެ ހަ މިލިއަން މީހުންގެ އާބާދީއަށް އިތުރު ޕާޓީއެއްގެ ވެރިކަމެއް ފެނިފައެއް ނެތެވެ. ޕީއޭޕީން އިންތިޚާބުގައި 90% ދާއިރާއިން ކާމިޔާބީ ހޯދާފައިވީ ނަމަވެސް، ބޮޑުވަޒީރު ލޯރެންސް ވޮންގއަށް ވެރިކަން ކުރުމުގައި ބޮޑެތި ގޮންޖެހުންތަކަކާ ކުރިމަތިލައްވަން ޖެހިވަޑައިގަންނަވާނެ ކަމުގައި މަޝްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. އެއް ސަބަބަކީ، ނިމިދިޔަ ދައުރުގައި ޕީއޭޕީގެ ސަރުކާރަށް ބޮޑެތި ކުރިއެރުންތަކެއް ހޯދިފައި ނެތުމެވެ.

އިންތިޚާބުގައި ލިބުނު ކާމިޔާބީ ޕީއޭޕީން ރަސްމީކޮށް އިޢުލާނު ކޮށްފައި ނެތް ނަމަވެސް ސިންގަޕޫރުގެ މީޑިއާތަކުން ބުނީ، އިންތިޚާބުގައި ވޯޓުލާފައިވާ މީހުންގެ ތެރެއިން 65.57% މީހުންގެ ތާއީދު އެ ޕާޓީން ކަށަވަރު ކޮށްފައިވާ ކަމުގައެވެ. 2020 ވަނަ އަހަރުގެ އިންތިޚާބުގައި އެ ޕާޓީއަށް ލިބިފައި ވަނީ 61.2% މީހުންގެ ތާއީދެވެ. މި ނަތީޖާއަށް ބަލާއިރު، ޕީއޭޕީއަށް އޮތް ތާއީދު އިތުރުވެފައިވާ ކަމުގައި މަޝްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.

ސިންގަޕޫރުގެ ހަތަރު ވަނަ ބޮޑުވަޒީރު ކަމުގެ މަޤާމާ 52 އަހަރުގެ ވޮންގ ޙަވާލުވެ ވަޑައިގަންނަވާފައި ވަނީ 2024 ވަނަ އަހަރުއެވެ. އޭނާ ވެރިކަމާ ޙަވާލުވެ ވަޑައިގަންނަވާފައި ވަނީ ތަރައްޤީއާއި ތަމައްދުނު ދަމަހައްޓައި، ވެރިކަން ކުރުމުގެ އައު އުސްލޫބެއް ނުވަތަ ގޮތްތަކެއް ތަޢާރުފު ކުރައްވާނެ ކަމުގެ ވަޢުދާ އެކުގައެވެ. އޭނާގެ ކުރިން ސިންގަޕޫރުގެ ބޮޑުވަޒީރު ކަމުގެ މަޤާމު ފުރުއްވާފައި ވަނީ ލީ ޝިޔެން ލޫންގެވެ. އެއީ، ޒަމާނީ ސިންގަޕޫރުގެ ބާނީގެ ގޮތުގައި ބެލެވޭ ކުރީގެ ބޮޑުވަޒީރު ލީ ކުވާން ޔޫގެ ދަރިކަލުންނެވެ.

ވިދިވިދިގެން 14 ވަނަ ޢާންމު އިންތިޚާބެއް ޕީއޭޕީން ކާމިޔާބުކޮށް، އެ ޕާޓީގެ ވޮންގ ވެރިކަމާ ޙަވާލުވެ ވަޑައިގަންނަވާއިރު އޭނާއަށް ބޮޑެތި ގޮންޖެހުންތަކަކާ ކުރިމަތިލައްވަން ޖެހިވަޑައިގަންނަވާނެއެވެ. އޭގެ ތެރޭގައި، ދިރިއުޅުމުގެ ޚަރަދުތައް އިންތިހާއަށް އުފުލުމާއި ބޯހިޔާވަހިކަމުގެ ދަތިކަން ފާހަގަ ކުރެވެއެވެ. މިއީ، ދިރިއުޅުމުގެ ޚަރަދުތައް އެންމެ ބޮޑު ޤައުމުގެ ގޮތުގައި ވެސް ބެލެވޭ ސިންގަޕޫރުގެ ރައްޔިތުންނަށް މި ވަގުތު ކުރިމަތިވެފައިވާ އެންމެ ބޮޑެތި މައްސަލަތަކެވެ.

މީގެ އިތުރުން، ވިޔަފާރިއަށް ބަރޯސާވެފައި އޮތް ސިންގަޕޫރުގެ އިޤްތިޞާދީ ކުރިއެރުން މަޑުޖެހުމުގެ ބިރު އޮތް ކަމުގައި މަޝްރަޙު ދިރާސދިރާސާ ކުރާ ފަރާތްތަކުން އިންޒާރު ދެއެވެ. އަދި، އެމެރިކާއަށް އެތެރެ ކުރާ މުދަލުން ނަގާ އިމްޕޯޓް ޑިއުޓީ ބޮޑުކޮށް، ފަށާފައިވާ އިޤްތިޞާދީ ކުރިމަތިލުންތަކުގެ ނޭދެވޭ އަސަރުތައް ސިންގަޕޫރުގެ އިޤްތިޞާދަށް ކުރިމަތިވާނެ ކަމުގައި ވެސް އެ ފަރާތްތަކުން ޤަބޫލު ކުރެއެވެ. މިއާ އެކު، ވަޒީފާ އުފެއްދުން މަޑުޖެހޭނެ ކަމުގައި ވެސް އެ ފަރާތްތަކުން ދެކެއެވެ.

ނިންމާލުމުގެ ގޮތުން ދަންނަވާނަމަ، ސިންގަޕޫރުގެ އައު ސަރުކާރަށް ކުރިމަތިވެފައިވާ ގޮންޖެހުންތައް ޙައްލުކުރުމަށް ހަރުދަނާ ސިޔާސަތުތަކެއް އެކުލަވާލައި، އެ ޤައުމުގެ އިޤްތިޞާދީ ކުރިއެރުމާއި އިޖްތިމާޢީ ރައްކާތެރިކަން ދެމެހެއްޓުމަށް މަސައްކަތްކުރަން ޖެހޭނެއެވެ. މިކަމުގައި ބޮޑުވަޒީރު ވޮންގގެ ލީޑަރޝިޕް އަދި ޕީއޭޕީގެ ދިގު މުއްދަތުގެ ތަޖުރިބާ މުހިންމު ދައުރެއް އަދާކުރާނެ ކަމަށް ބެލެވެއެވެ.އެވެ.