އިޒްރޭލުން ފަލަސްތީނަށް ދެމުންދާ ލާއިންސާނީ ހަމަލާތަކާ ގުޅިގެން އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން މިހާރު ބަލަމުން އަންނަ މައްސަލައިގައި މާދަމާ ބާއްވާ އަޑުއެހުމެއްގައި ބަންޑާރަ ނައިބު އަހުމަދު އުޝާމް ބަޔާނެއް ދެއްވާ ގޮތަށް ނިންމަވައިފިއެވެ.
އޭޖީ އޮފީހުން ބުނީ، ފަަލަސްތީނު މައްސަލައިގައި އައިސީޖޭގެ އިސްތިޝާރީ ލަފަޔަކަށް އެދި ހުށަހަޅާފައިވާ މައްސަލައިގައި މިހާރު ކުރިއަށްގެންދާ އަޑުއެހުންތަކުގައި ރާއްޖޭގެ ފަރާތުން ބަންޑާރަ ނައިބު އުޝާމް މާދަމާ އެ ކޯޓަށް ހާޒިރުވެ، ބަޔާނެއް ދެއްވުމަށް ހަމަޖެހިފައިވާ ކަމަށެވެ.
އދ. އާއި އެހެނިހެން ބައިނަލްއަގުވާމީ ޖަމިއްޔާތަކާއި އެހެން ގައުމުތަކުން ފަލަސްތީނުގެ އާންމު ރައްޔިތުންނަށް ދެމުންދާ އިންސާނީ އެހީތެރިކަމަށް އިޒްރޭލުން ހުރަސްއެޅުމަށް ކުރާ ކަންކަމާ ގުޅޭ މައްސަލައެއް މިހާރު އައިސީޖޭގައި ކުރިއަށްދެއެވެ.
އެ މައްސަލަ އައިސީޖޭއަށް ހުށަހަޅާފައިވަނީ މިދިޔަ ޑިސެމްބަރު މަހުގެ 19 ވަނަ ދުވަހުއެވެ. މީގެ ކުރިން މިދިޔަ ފެބްރުއަރީ މަހުގެ 28 ވަނަ ދުވަހު އައިސީޖޭއަށް ލިޔުމުންވެސް ރާއްޖެއިން ވަނީ ބަޔާން ހުށަހަޅައިފައެވެ.
ކިޔުންތެރިންގެ ހިޔާލު