ރައްޔިތުންގެ މަޖިލީހުން މިއަދު ބޭއްވި ޖަލްސާގައި، ސިވިލް ސާވިސް ކޮމިޝަނުގެ ނައިބު ރައީސްކަމަށް މއ. ސިގްމާ، މުޙައްމަދު މުޖުތާޒު އައްޔަނުކުރުމަށް ފާސްކޮށްފިއެވެ. މި ފާސްކުރުން ވަނީ ވޯޓުގައި ބައިވެރިވި 64 މެންބަރުންގެ އިއްތިފާޤުން ކަމަށްވީއިރު، މުޖުތާޒަކީ މި މަހުގެ 20 ވަނަ ދުވަހު ސިވިލް ސާވިސް ކޮމިޝަނުގެ މެންބަރުކަމަށް އައްޔަނުކުރެވުނު ބޭފުޅެކެވެ.

މުޙައްމަދު މުޖުތާޒަކީ މޯލްޑިވްސް ކޮލެޖް އޮފް ހަޔަރ އެޑިއުކޭޝަނުން ބެޗްލަރ އޮފް ލޯ ހާސިލުކުރައްވާފައިވާ ބޭފުޅެކެވެ. ސިވިލް ސާވިސް ކޮމިޝަނުގެ މެންބަރުކަމާ ހަވާލުވުމުގެ ކުރިން މުޖުތާޒު ވަނީ ރައީސް އޮފީހުގެ މިނިސްޓަރ އޮފް ސްޓޭޓް ފޯ ޕްރެޒިޑެންޝަލް އެފެއާޒްގެ މަޤާމާއި ރައްޔިތުންގެ މަޖިލީހުގެ މެންބަރުކަމުގެ މަޤާމު ފުރުއްވާފައެވެ.

ސިވިލް ސާވިސް ކޮމިޝަނުގެ މެންބަރުކަމުގެ މަޤާމެއް ހުސްވީ އެ ކޮމިޝަނުގެ ކުރީގެ ނައިބު ރައީސް އިބްރާހިމް ރަޝީދު މިދިޔަ މަހުގެ 11 ވަނަ ދުވަހު އިސްތިއުފާ ދެއްވުމާ ގުޅިގެންނެވެ. އިބްރާހިމް ރަޝީދު އިސްތިއުފާ ދެއްވީ އޭނާ މަޤާމުން ވަކިކުރުމުގެ މަރުޙަލާ ފެށުމަށް ރައްޔިތުންގެ މަޖިލީހުގެ ތަޅުމަށް ފޮނުވުމަށް މިނިވަން މުއައްސަސާތަކާބެހޭ ކޮމިޓީން ނިންމުމަށްފަހުގައެވެ.