ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ 2027 ވަނަ އަހަރުގެ ނިޔަލަށް ޑޮލަރުގެ މައްސަލަ ހައްލުކޮށް، ބޭންކު ރޭޓުގައި އާންމު ރައްޔިތުންނަށް ޑޮލަރު ލިބޭނެ ކަމަށެވެ. މި ބަސްފުޅު އެމަނިކުފާނު ވިދާޅުވެފައިވަނީ ދިވެހި ޒުވާނުންނަށް އަމާޒުކޮށްގެން މީސް މީޑިއާގައި ފަށާފައިވާ “ސްޕޮޓް އޮން” ޕޮޑްކާސްޓްގެ ފުރަތަމަ އެޕިސޯޑުގައެވެ.
މި އެޕިސޯޑުގައި ޒުވާނުންގެ ކަންބޮޑުވުންތަކުގެ މައްޗަށް އަލިއަޅުވާލާފައިވާއިރު، ޑޮލަރުގެ މައްސަލައަށް ދާއިމީ ހައްލެއް ލިބޭނެ ދުވަހަކާ ގުޅޭގޮތުން ރައީސުލްޖުމްހޫރިއްޔާއާ ސުވާލު ކުރެވުނެވެ. ޖަވާބުގައި އެމަނިކުފާނު ވިދާޅުވީ ޑޮލަރުގެ މައްސަލަ ހައްލުވާނެ ކަމަށާއި، ނަމަވެސް އެކަމަށް ވަގުތު ނަގާނެ ކަމަށެވެ. އަދި ސަރުކާރުން ނިންމަވާފައިވާ ފިޔަވަޅުތައް ތަންފީޒުވެއްޖެނަމަ މި މައްސަލައަށް ހައްލު ލިބޭނެ ކަމަށް އެމަނިކުފާނު ޔަޤީންކަން ދެއްވިއެވެ.
ރައީސުލްޖުމްހޫރިއްޔާ އިތުރަށް ފާހަގަކުރެއްވި ގޮތުގައި ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކުން މިހާރުވެސް ޤަވާޢިދުން ބޭންކުތަކަށް ޑޮލަރު މާރުކުރަމުން ގެންދެއެވެ. އަދި ޑޮލަރުގެ މައްސަލަ ހައްލުކުރުމަށް ސަރުކާރުން ކުރަމުންދާ މަސައްކަތްތަކަށް އެއްބާރުލުން ލިބެމުންދާކަންވެސް އެމަނިކުފާނު ފާހަގަކުރެއްވިއެވެ.
“މިހާރު އަޅުގަނޑުމެން އަޅަމުންދާ ފިޔަވަޅުތައް އިޢުލާންކޮށްފައިވާ ގޮތަށް ތަންފީޒުވެއްޖެނަމަ، ޑޮލަރުގެ މައްސަލަ ހައްލުވާނެކަމުގެ ފުރިހަމަ ޔަޤީންކަން އަޅުގަނޑަށް އެބައޮތް. މުޅިން ރަނގަޅުވާން ގިނަ ފިޔަވަޅުތަކެއް އަޅަން ޖެހޭނެ. މިހާރު އަޅުގަނޑުމެން ލަނޑުދަނޑިއަކީ 2027 ވަނަ އަހަރުގެ ނިޔަލަށް ރަސްމީ ބޭންކު ރޭޓުގައި ޑޮލަރު ލިބޭނެ ގޮތް ހެދުން،” ރައީސުލްޖުމްހޫރިއްޔާ ވިދާޅުވިއެވެ.
ބޭރުފައިސާގެ ދަތިކަން ޙައްލުކުރުމަށްޓަކައި ސަރުކާރުން ވަނީ ގިނަ ފިޔަވަޅުތަކެއް އަޅަން ނިންމަވާފައެވެ. މީގެ ތެރޭގައި ނިޒާމީ ގޮތެއްގައި ދޫކޮށްލެވިފައިވާ ބޭރުފައިސާގެ ކަޅުބާޒާރުގެ މައްސަލަ ހައްލުކުރުމުގެ މަސައްކަތް ފެށުމާއި، މިއަހަރު ފެށުނުއިރު ބޭރުފައިސާއާ ގުޅޭ އައު ޤާނޫނަކަށް ޢަމަލުކުރަން ފެށުން ހިމެނެއެވެ. މި ޤާނޫނުގެ ދަށުން ރާއްޖޭގައި ބޭރު ފައިސާއިން އާމްދަނީ ލިބޭ ހުރިހާ ވިޔަފާރިއަކުންވެސް، ދިވެހިރާއްޖޭގައި ހިންގަމުންދާ ބޭންކުތަކަށް ބޭރުފައިސާ މާރުކުރަން ޖެހެއެވެ.
ކިޔުންތެރިންގެ ހިޔާލު