ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ، ދިވެހި އަަސްކަރިއްޔާގެ ޤާބިލުކަން އިތުރުކޮށް، ބާރުވެރިކުރުމަށް ސަރުކާރުން ކުރަމުންދާ މަސައްކަތްތަކާމެދު ޤައުމީ ލޯބި އުފެދިފައިވާ ކޮންމެ ދިވެއްސަކުވެސް ފަޚުރުވެރިވާން ޖެހޭނެ ކަމަށެވެ.
ރައީސުލްޖުމްހޫރިއްޔާ މި ވާހަކަފުޅު ދައްކަވާފައިވަނީ ސިފައިންގެ 133 ވަނަ އަހަރީ ދުވަހުގެ ރަސްމީ ޖަލްސާގައި ދެއްކެވި ޚިޠާބުގައެވެ. އެމަނިކުފާނު ފާހަގަކުރެއްވި ގޮތުގައި، ދިވެހިރާއްޖެ މިނިވަންކަމާއެކު މިހާތަނަށް އައިސްފައިވަނީ ދިވެހި ސިފައިންގެ މަތިވެރި ޤުރުބާނީތަކުގެ ސަބަބުންނެވެ. ޚާއްޞަކޮށް، ރާއްޖެއަށް ކުރިމަތިވެފައިވާ އެކިއެކި އުދުވާނީ ނުރައްކާތަކާއި ހާދިސާތަކުގައި، އަދި ރައްޔިތުންގެ އެހީތެރިކަމަށް އެދުނު ކ ކޮންމެ ދަނޑިވަޅެއްގައި، ދިވެހި ސިފައިން ވަނީ ފަޚުރުވެރި މަސައްކަތްތަކެއް ކޮށްދީފައެވެ.
ރައީސުލްޖުމްހޫރިއްޔާ އިތުރަށް ވިދާޅުވެފައިވަނީ، އެމަނިކުފާނުގެ ވެރިކަމުގައި އި އެންމެ އިސްކަމެއް ދެއްވަނީ ދިވެހިރާއްޖޭގެ މިނިވަންކަމާއި، ސިޔާދަތާއި، އިސްތިޤްލާލު ރައްކާތެރިކޮށް، ކުރިއަށް އޮތް ޖީލުތަކަށް ފޯރުކޮށްދިނުމަށް ކަމަށެވެ. މި މަސައްކަތުގައި އެންމެ މުހިންމު ދައުރެއް އަދާކުރާ ފަރާތަކީ ދިވެހި ސިފައިން ކަމަށްވެސް އެމަނިކުފާނު ފާހަގަކުރެއްވިއެވެ.
މީގެ އިތުރުން، ރައީސުލްޖުމްހޫރިއްޔާ ވިދާޅުވެފައިވަނީ، މި ސަރުކާރުން އަސްކަރިއްޔާގެ ތަރައްޤީއަށް ގިނަގުނަ މަސައްކަތްތަކެއް ކުރައްވާ، އެކަށީގެންވާ ކުރިއެރުންތަކެއް ހޯއްދަވައިދެއްވާފައިވާ ކަމަށެވެ. ނަމަވެސް، ބައެއް ފަރާތްތަކުން މި މަސައްކަތްތަކާމެދު ފާޑުކިޔާ ކަން ފާހަގަކުރައްވައި، ޤައުމީ ލޯބި އުފެދިފައިވާ ކޮންމެ ރައްޔިތަކުވެސް އަސްކަރިއްޔާއަށް ލިބޭ ކުރިއެރުންތަކާމެދު ފަޚުރުވެރިވާންޖެހޭނެ ކަމަށް އެމަނިކުފާނު ވިދާޅުވިއެވެ.
ނިންމާލައްވަވަމުން، ރައީސުލްޖުމްހޫރިއްޔާ ވިދާޅުވެފައިވަނީ، އަސްކަރިއްޔާގެ ތަރައްޤީއަށް ކުރައްވާ މަސައްކަތްތައް ފަޚުރުވެރިކަމާއެކު ކުރިއަށް ގެންދަވާނެ ކަމަށާއި، މިއީ ޤައުމަށްޓަކައި ކުރެވޭ ވަށާޖެހޭ ސިޔާސަތެއްގެ ދަށުން ކުރެވޭ މަސައްކަތްތަކެއް ކަމަށެވެ. އަދި މި މަސައްކަތްތަކަށް ފާޑުކިޔާ ފަރާތްތަކުގެ ވިސްނުމުން ޤައުމު ސަލާމަތްކުރުމަކީ ޤައުމު ދެކެ ލޯބިވާ ކޮންމެ ރައްޔިތެއްގެ ޒިންމާއެއް ކަމަށްވެސް އެމަނިކުފާނު ވިދާޅުވިއެވެ.
ކިޔުންތެރިންގެ ހިޔާލު