ތަޢުލަޤް ދީނީ ސުވާލު މުބާރާތް ހއ. ހޯރަފުށީގައި ފަށައިފިއެވެ.
މި އަހަރުގެ މި މުބާރާތް ކުރިއަށް ގެންދަނީ ހޯރަފުށީ ޕޮލިސް ސްޓޭޝަނާއި ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ ގުޅިގެންނެވެ.
މި މުބާރާތް ފެށުމަށް ބޭއްވި ރަސްމިއްޔާތު ޝަރަފުވެރިކޮށްދެއްވީ ހއ. އަތޮޅު ކޮމާންޑަރު އިންސްޕެކްޓަރ އޮފް ޕޮލިސް ހުސައިން ޝިޒްލީންއެވެ. މުބާރާތް ފައްޓަވައި ދެއްވައި ކޮމާންޑަރު ދެއްކެވި ވާހަކަފުޅުގައި، މިފަދަ މުބާރާތްތަކުގެ ސަބަބުން ދަރިވަރުންގެ މެދުގައި ދީނީ ހޭލުންތެރިކަން އިތުރުވެ އިޖުތިމާއީ ފޭރާން ރަނގަޅުވެގެންދާނެކަން ފާހަގަކުރައްވައި ދަރިވަރުންނަށް ހިތްވަރުދެއްވިއެވެ.
އެޕްރީލް 20 އިން 24 އަށް ކުރިއަށް ގެންދާ މި މުބާރާތަކީ ހއ. އަތޮޅު މަދަރުސާގެ ގުރޭޑް 6 އިން ދަށުގެ ދަރިވަރުންނަށް އަމާޒުކޮށްގެން ކޮންމެ އަހަރަކު ވެސް ކުރިއަށް ގެންދާ މުބާރާތެކެވެ. މިއީ މި މުބާރާތް ކުރިއަށް ގެންދާ ހަތަރުވަނަ އަހަރެވެ. މި އަހަރުގެ މުބާރާތުގައި 60 އަށް ވުރެ ގިނަ ދަރިވަރުން ބައިވެރިވެއެވެ. މި މުބާރާތަށް ދަރިވަރުންނާއި ބެލެނިވެރިންގެ ފަރާތުން ވަރަށް ބޮޑު ތަރުހީބެއް ލިބެމުންދެއެވެ.
މި މުބާރާތަކީ އިސްލާމީ ތަރުބިއްޔަތު އެނގިތިބި، ދީނީ ކަންކަމަށް ފަރުވާތެރިވެ މައިންބަފައިން ދެކެ ލޯބިވާ އަދި ބޮޑެތި މީހުންނަށް އިހުތިރާމުކުރާ، ނަމާދުގައި ކިޔާ ތަކެއްޗާއި ޛިކުރުތައް އެނގި ތިބި ރަނގަޅު ޖީލެއް ހޯރަފުށީގައި ބިނާކުރުމުގެ މަގުސަދުގައި ކުރިއަށް ގެންދާ މުބާރާތެކެވެ.
ކިޔުންތެރިންގެ ހިޔާލު