ރ. އުނގޫފާރުގެ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫޢުގެ މަސައްކަތް ކުރިއަށްދާ ގޮތުގެ އަޕްޑޭޓެއް އެމްޓީސީސީން ދީފިއެވެ. މި ކުންފުނިން މަޢުލޫމާތު ދެއްވާފައިވާ ގޮތުގައި، މިވަގުތު މަޝްރޫޢުގެ ދަށުން ކުރިއަށްދަނީ ރިވެޓްމަންޓް ޕްރޮފައިލިންގގެ މަސައްކަތެވެ.
މި މަޝްރޫޢުގެ ދަށުން ކުރިއަށްދާ މައިގަނޑު މަސައްކަތްތަކުގެ ތެރޭގައި 10 ހެކްޓަރުގެ ބިން ހިއްކުމާއި، 838.60 މީޓަރުގެ ބޮޑުހިލައިގެ ރިވެޓްމަންޓް އަދި 75 މީޓަރުގެ ބޮޑުހިލައިގެ ގްރޮއިން ޖެހުން ހިމެނެއެވެ. އެމްޓީސީސީން އިތުރަށް ހާމަކުރެއްވި ގޮތުގައި މި މަޝްރޫޢަކީ 71.08 މިލިއަން ރުފިޔާގެ އަގުހުރި މަޝްރޫޢެކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރިން ވިދާޅުވެފައިވަނީ އުނގޫފާރުގެ ފަޅުން ހިއްކަން އޮތް އެންމެ ބޮޑު މިންވަރަކަށް ބިން ހިއްކައިދެއްވާނެ ކަމަށެވެ. މިގޮތުން، މިހާރު ރޭވިފައިވާ މިންވަރަށްވުރެ އިތުރު ތިން ހެކްޓަރު ހިއްކުމުން، ފަޅުގެ ތެރެއިން ހިއްކަން އޮތް އެންމެ ބޮޑު މިންވަރު ހިއްކޭނެ ކަމަށް ރައީސް ފާހަގަކުރެއްވިއެވެ.
“އިރާދަކުރެއްވިއްޔާ، އަޅުގަނޑު ވަޢުދުވެފައިވާ ގޮތަށް، ފަޅުގެ ތެރެއިން ހިއްކަން އޮތް އެންމެ ބޮޑު މިންވަރަކަށް، އިތުރު ތިން ހެކްޓަރު އިތުރުކޮށްގެން ބިން ހިއްކާނަމެވެ،” ރައީސް ވިދާޅުވިއެވެ.
