ކުޅުދުއްފުށި ސިޓީ ކައިރިއަށް މަސް ހިފަން ފޭބި މީހަކަށް މިޔަރެއް ހަމަލާދީފިއެވެ.
ކުޅުދުއްފުށީ ރީޖިނަލް ހޮސްޕިޓަލްގެ އޮފިޝަލަކު ވިދާޅުވީ މިޔަރު ހަމަލާދިނުމުގެ ސަބަބުން އުމުރުން 30 އަހަރުގެ ޒުވާނާގެ ޒުވާނަކު މިއަދު ހެނދުނު 6:45 ހާއިރު އެ ހޮސްޕިޓަލަށް ގެންދިޔަ ކަމަށެވެ. އެ ޒުވާނާގެ ކޮނޑުހުޅު ނެއްޓިފައިވާ ކަމަށް އޮފިޝަލް ވިދާޅުވިއެވެ.
އެ ޒުވާނާގެ ކަނާތު ކޮނޑު ކައިރިއަށް ދިން އެ ހަމަލާއާ ގުޅިގެން ޑޮކްޓަރުން ފަރުވާދީ ކޮނޑު ހުޅު އަޅުވައި ލޭ މަނާކޮށްފައިވާ ކަމަށް ވެސް އޮފިޝަލް ވިދާޅުވިއެވެ.
އެ ޒުވާނާގެ ހާލު ރަނގަޅު ކަމަށް ޑޮކްޓަރުންނާ ހަވާލާދީ ހޮސްޕިޓަލުން ބުންޏެވެ. ނަމަވެސް ޒަޚަމްވި ތަނުގެ ހަންގަނޑު ވަރަށް ބޮޑަށް ހަލާކުވެފައި ވާތީ އިތުރު ފަރުވާއަށް މާލެ ފޮނުވުމުގެ މަސައްކަތް ކުރަމުން އަންނަ ކަމަށް ހޮސްޕިޓަލުން ބުންޏެވެ.
މިޔަރު ހަމަލާދިނުމަކީ ވަރަށް މަދުން ރާއްޖޭގައި ހިނގާ ކަމެކެވެ. އެގޮތުން މިދިޔަ އަހަރުގެ ޖޫން މަހުގެ ތެރޭގައި ސިފައިންގެ ތަމްރީނެއްގައި އުޅުނު އުމުރުން 23 އަހަރުގެ ލާންސްކޯޕްރަލް، މުހައްމަދު ޒައިދާނަށް މިޔަރެއް ހަމަލާދިނުމުގެ ސަބަބުން ވަނީ ނިޔާވެފައެވެ.
