ނ. ވެލިދޫގައި ޑައިލިސިސްގެ ޚިދުމަތް ފަށައިފިއެވެ.
ވެލިދޫގައި މި ހިދުމަތް ފެށުމާއެކު މާލެ ފިޔަވައި ރާއްޖޭގެ 15 ރަށަކުން މިހާރު މި ޚިދުމަތް ލިބޭނެއެވެ. މިއީ ނ. އަތޮޅުގައި ޑައިލިސިސްގެ ޚިދުމަތް ފެށި ދެވަނަ ރަށެވެ.
ޕީއެސްއެމްއަށް ދެއްވި އިންޓަވިއުއެއްގައި ވެލިދޫ ކައުންސިލް މެމްބަރު އަބްދުﷲ އަބްދުއްރައްޒާގު ވިދާޅުވީ އެރަށުގައި ފެށިގެން މިދިޔަ ޑައިލިސިސްގެ ޚިދުމަތާއެކު ފައިދާ ކުރާނީ ހަމައެކަނި ވެލިދޫގެ ރައްޔިތުންނަށް ނޫންކަމަށެވެ. އަތޮޅުގެ އެހެން ރަށްރަށުގެ ރައްޔިތުންނަށްވެސް މިކަމުން ފައިދާ ކުރާނެކަމަށެވެ.
އޭނާ ވިދާޅުވީ ޑައިލިސިސްގެ ޚިދުމަތް ފެށިގެން ދިޔުމަކީ ރައްޔިތުންނަށް ލިބިގެން ދިޔަ ވަރަށް ބޮޑު ލުއިފަސޭހަކަމެއްކަމަށެވެ.
“ޑައިލިސިސްގެ ޚިދުމަތާއެކު ވަރަށް ބޮޑު ލުއިފަސޭތަކެއް ލިބިގެންދާނެ. އަތޮޅު ތެރޭގެ ގިނަ ބަޔަކަށް މީ ވަރަށް ބޮޑު ފަސޭހައެއް” އަބްދުއްރައްޒާޤު ވިދާޅުވިއެވެ.
ޑައިލިސިސްގެ ޚިދުމަތާއެކު އެތެރެހަށީގެ ޚާއްސަ ޑޮކްޓަރެއް ވެސް އެރަށަށް ވަނީ ހަމަޖައްސާފައެވެ.
ވެލިދޫގައި ގާއިމްކޮށްފައިވާ ޑައިލަސިސް ސެންޓަރުން އެއްފަހަރާ 3 މީހުންނަށް ފަރުވާ ދެވޭނެއެވެ. ވެލިދޫ ޞިއްޙީ މަރުކަޒުގައި މި ޚިދުމަތް ފަށުމުގެ ގޮތުން 2 މީހަކަށް ޑައިލިސިސް ފަރުވާ ވަނީ ދީފައެވެ. ސަރުކާރުގެ އަމާޒަކީ މި ދައުރުގެ ތެރޭގައި ރާއްޖޭގެ ހުރިހާ އަތޮޅެއްގައި ޑައިލިސިސްގެ ޚިދުމަތް ފެށުމެވެ.
