ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން އަންގައިފައިވާ ގޮތުގައި، ހުޅުމާލޭ ދެވަނަ ފިޔަވަހީގެ ހިޔާ ޓަވަރުތަކުގައި ކުރަންޖެހޭ މުހިންމު މަސައްކަތެއްގެ ސަބަބުން، މާދަމާ ހިޔާގެ ފުރަތަމަ ޓަވަރުގެ ކަރަންޓު ވަގުތީގޮތުން މެދުކެނޑިގެންދާނެއެވެ.

ކުންފުނިން ދީފައިވާ މަޢުލޫމާތުގައިވާ ގޮތުން، މާދަމާ ހެނދުނު 9:00 އިން ފެށިގެން ހަވީރު 17:00 އާ ހަމައަށް ކުރިއަށްދާ މި މަސައްކަތުގައި، އެއްވަނަ ޓަވަރުގެ ކޮންމެ އެޕާޓްމަންޓަކުން ގާތްގަނޑަކަށް 30 މިނެޓުގެ މުއްދަތަކަށް ކަރަންޓު ކެނޑިގެންދާނެއެވެ.

މި މަސައްކަތަކީ ހިޔާ ޓަވަރުތަކުގެ ކަރަންޓުގެ ޚިދުމަތް އިތުރަށް ހަރުދަނާކުރުމަށްޓަކައި ކުރެވޭ މުހިންމު މަސައްކަތެއް ކަމަށާއި، އެކި ދުވަސްތަކަށް ބަހާލައިގެން ކުރިއަށްގެންދެވޭ މަސައްކަތެއްކަން ސްޓެލްކޯއިން ފާހަގަކޮށްފައިވެއެވެ.

މި މަސައްކަތުގެ ސަބަބުން ދިމާވެދާނެ ދަތިތަކަށް ސްޓެލްކޯއިން ވަނީ މަޢާފަށް އެދިފައެވެ. އަދި ހިޔާ ޓަވަރުތަކުގައި ދިރިއުޅޭ ރައްޔިތުންނަށް މި މަސައްކަތުގެ ސަބަބުން ކުރިމަތިވެދާނެ ވަގުތީ ދަތިތަކަށް ތައްޔާރުވުމަށް ސްޓެލްކޯއިން ވަނީ އިލްތިމާސްކޮށްފައެވެ.