ހުޅުމާލޭގައި މިރޭ ހިނގި ސައިކަލު އެކްސިޑެންޓެއްގައި 29 އަހަރުގެ ޒުވާނަކަށް ވަނީ ސީރިއަސް އަނިޔާތަކެއް ލިބިފައެވެ. މި ހާދިސާ ހިނގާފައިވަނީ ހުޅުމާލެ ވެމްކޯ ސައިޓް ކައިރީގައި، ފޭސް 1 އާއި ފޭސް 2 ގުޅުވައިދޭ ބްރިޖުގައެވެ.
ހާދިސާ ހިނގި ގޮތުގެ ތަފްސީލު ދެމުން، އެ މަންޒަރު ދުށް ފަރާތަކުން މަޢުލޫމާތު ދިންގޮތުގައި، ބްރިޖުން ފައިބައިގެން އައިސް ކުއްލިއަކަށް ފެނުނު ބަމްޕަރަކަށް ބުރަކި ޖެއްސުމުން ސައިކަލް ކަހާލައިގެން ވެއްޓުނެވެ. މި ހާދިސާގައި އަނިޔާވި ފަރާތުގެ ބޮލަށާއި ކަނދުރާއަށް ވަނީ ގެއްލުން ލިބިފައެވެ.
ހުޅުމާލެ ހޮސްޕިޓަލުގެ މީޑިއާ އޮފިޝަލަކު ވިދާޅުވިދާޅުވި ގޮތުގައި، މެންދަމު 12:00 ގާތްކުރާ އިރު ހޮސްޕިޓަލަށް ގެނެވުނު މި ޒުވާނާގެ ހާލަތު ސީރިއަސްވުމާ ގުޅިގެން، އިންޓެންސިވް ކެއަރގެ ފަރުވާ ދިނުމަށްޓަކައި އައިޖީއެމްއެޗަށް ވަނީ ބަދަލުކުރެވިފައެވެ.
މީގެ އިތުރުން، ހަމަ މިރޭ ހުޅުމާލޭގެ ނިރޮޅު މަގުގައި ހުންނަ ސްކޭޓް ޕާކް ކައިރީގައި ވެސް ވަނީ އިތުރު އެކްސިޑެންޓެއް ހިނގާފައެވެ. މި ހާދިސާގައި ދެ ސައިކަލް ޖެހުމުގެ ސަބަބުން ޒުވާން އަންހެނަކަށް ވަނީ އަނިޔާވެފައެވެ. ނަމަވެސް، އޭނާގެ އަނިޔާތައް އެހާ ސީރިއަސް ނޫން ކަމަށް ބެލެވެއެވެ.
މި ދެ ހާދިސާއާ ގުޅޭގޮތުން ފުލުހުންގެ ފަރާތުން އަދި އެއްވެސް ބަޔާނެއް ދީފައެއް ނުވެއެވެ. މި ހާދިސާތަކާ ގުޅޭ އިތުރު މަޢުލޫމާތު ލިބުމުން އާންމުކުރެވޭނެއެވެ.
