މިއަހަރުގެ މިހާތަނަށް ދިވެހިރާއްޖެއަށް 647,677 އަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ފަތުރުވެރިކަމާބެހޭ ވުޒާރާއިން ހާމަކޮށްފިއެވެ. މީގެ އިތުރުން، މިވަގުތު 44 ބައިނަލްއަޤްވާމީ އެއަރލައިނަކުން ދިވެހިރާއްޖެއަށް ދަތުރުކުރަމުންދާކަމަށްވެސް އެ ވުޒާރާގެ ތަފާސްހިސާބުތަކުން ދައްކައެވެ.
މޯލްޑިވްސް ޓޫރިޒަމް އަޕްޑޭޓް ރިޕޯޓުގައިވާ ގޮތުން، މި 44 އެއަރލައިނުގެ ތެރޭގައި ޔޫރަޕް، މެދުއިރުމަތި އަދި އޭޝިއާ ސަރަޙައްދުގެ އެއަރލައިންތައް ހިމެނެއެވެ. އަދި އިތުރު އެއަރލައިންތަކުންވެސް ދިވެހިރާއްޖެއަށް ދަތުރުކުރުމަށް ޝައުޤުވެރިކަން ފާޅުކުރަމުންދާކަން ފާހަގަކުރެވެއެވެ.
ފަތުރުވެރިކަމާބެހޭ ވުޒާރާގެ އެންމެ ފަހުގެ ތަފާސްހިސާބުތަކުން ދައްކާގޮތުގައި، މިމަހުގެ 2 ވަނަ ދުވަހުގެ ނިޔަލަށް ޖުމްލަ 647,677 ފަތުރުވެރިން ދިވެހިރާއްޖެއަށް ޒިޔާރަތްކޮށްފައިވެއެވެ. މިއީ ފާއިތުވި އަހަރުގެ މި މުއްދަތާ އަޅާބަލާއިރު 5.2 އިންސައްތައިގެ ކުރިއެރުމެކެވެ.
މިއަހަރުގެ މިހާތަނަށް ދިވެހިރާއްޖެއަށް ޒިޔާރަތްކުރި ފަތުރުވެރިންގެ ތެރެއިން:
• 69.4 އިންސައްތަ (449,382) ރިސޯޓުތަކުގައި
• 25.2 އިންސައްތަ (162,928) ގެސްޓްހައުސްތަކުގައި
• 2.9 އިންސައްތަ (18,879) ހޮޓާތަކުގައި
• 2.5 އިންސައްތަ (16,041) ސަފާރީ އުޅަނދުތަކުގައި
މަޑުކޮށްފައިވާކަމަށް ތަފާސްހިސާބުތަކުން ދައްކައެވެ.
މިވަގުތު ދިވެހިރާއްޖޭގައި ފަތުރުވެރިންނަށް ޚިދުމަތްދޭ 1,201 ތަނެއް ހުޅުވިފައިވާއިރު، މި ތަންތަނުގެ ޖުމްލަ އެނދުގެ ޢަދަދު 65,561 އަށް އަރާކަމަށް މޯލްޑިވްސް ޓޫރިޒަމް އަޕްޑޭޓް ރިޕޯޓުން ހާމަކޮށްފައިވެއެވެ. މީގެ ތެރެއިން 97.3 އިންސައްތަ އެނދު މިހާރުވެސް ބޭނުންކުރެވެމުންދެއެވެ.
އަހަރުގެ މިހާތަނަށް ދިވެހިރާއްޖެއަށް އެންމެ ގިނަ ފަތުރުވެރިން ޒިޔާރަތްކޮށްފައިވަނީ ޗައިނާއިންނެވެ. ޗައިނާއިން 75,135 (11.6 އިންސައްތަ) ފަތުރުވެރިން ޒިޔާރަތްކޮށްފައިވާއިރު، ދެވަނައަށް އެންމެ ގިނަ ފަތުރުވެރިން އައިސްފައިވަނީ ރަޝިއާއިންނެވެ. ރަޝިއާއިން 68,375 (10.6 އިންސައްތަ) ފަތުރުވެރިން ޒިޔާރަތްކޮށްފައިވާކަމަށް ތަފާސްހިސާބުތަކުން ދައްކައެވެ. ރައިސްގެ ނިންމެވުވާއި އެއްގޮތަށް ވައިޓްބޮޑީ އެއަރކުރަފްޓް މޯލްޑިވިއަން އިން އުދުހެން ފެށުމާއި އެކު ފަތުރުވެރިކަމަށް އިތުރު ކުރިއރުން ދަނީ އަންނަމުންނެއެވެ.
