ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާ ގޮތުގައި، އދ.ގެ އަންހެނުންގެ ކޮމިޝަނަށް ދިވެހިރާއްޖެ ފުރަތަމަ ފަހަރަށް އިންތިޚާބުވުމަކީ ޤައުމަށް ލިބުނު މަތިވެރި ޝަރަފެކެވެ. މީގެ އިތުރުން، އަންހެނުންގެ ޙައްޤުތައް ރައްކާތެރިކޮށް، އެފަރާތްތަކުގެ ކުރިއެރުމަށް މަސައްކަތްކުރުމުގައި ދިވެހިރާއްޖެއިން އަބަދުވެސް ތައްޔާރަށް ތިބޭނެކަމުގެ ޔަޤީންކަން އެމަނިކުފާނު ދެއްވާފައިވެއެވެ.
It is a great honour for the Maldives to be elected for membership of the Commission on the Status of Women (@UN_Women) for the 2026-2030 term.
I further extend congratulations to all countries who were elected to the Commission today. Through collective partnership, we stand…
— Dr Mohamed Muizzu (@MMuizzu) April 4, 2025
އދ.ގެ ކޮމިޝަން އޮން ދަ ސްޓޭޓަސް އޮފް ވިމެންއަކީ އަންހެނުންގެ ޙައްޤުތަކަށް މަސައްކަތްކުރާ ބައިނަލްއަޤްވާމީ އެންމެ ނުފޫޒުގަދަ ޖަމްޢިއްޔާތަކުގެ ތެރެއިން އެއް ޖަމްޢިއްޔާއެވެ. މި ޖަމްޢިއްޔާގެ މެންބަރުކަން ދިވެހިރާއްޖެއަށް ލިބިފައިވަނީ 2026 އިން 2030 އަށެވެ. މިއީ ދިވެހިރާއްޖެ މި ޖަމްޢިއްޔާގެ މެންބަރަކަށްވާ ފުރަތަމަ ފަހަރެވެ.
ރައީސުލްޖުމްހޫރިއްޔާ އިތުރަށް ފާހަގަކުރައްވާފައިވަނީ، ވޭތުވެދިޔަ އަހަރުތަކުގައި އަންހެނުން ބާރުވެރިކުރުވުމަށް ދިވެހިރާއްޖެއިން ޤައުމީ އަދި ބައިނަލްއަޤްވާމީ ފެންވަރުގައި ފާހަގަކޮށްލެވޭ މަސައްކަތްތަކެއް ކޮށްފައިވާކަމެވެ. އަދި ކުރިއަށް އޮތް ދުވަސްތަކުގައި މި ޖަމްޢިއްޔާގެ އެހެނިހެން މެންބަރު ޤައުމުތަކާ ގުޅިގެން، ޖަމްޢިއްޔާގެ ކުރިއެރުމަށް މުހިންމު މަސައްކަތްތަކެއް ކުރެވޭނެކަމުގެ އުންމީދު ފާޅުކުރައްވާފައިވެއެވެ.
