ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ދުންފަތުގެ އިސްތިޢުމާލުކުރުމަށް އަލަށް ވަންނަ ޒުވާނުން އެކަމުން ދުރުކުރުމަށް ޚާއްޞަ ފިޔަވަޅުތަކެއް އެޅުއްވުމަށް ނިންމަވާފައިވާ ކަމަށް އިޢުލާނުކުރައްވާފައެވެ. މި ފިޔަވަޅުތައް “ޖެނެރޭޝަން ބޭން” ގެ ނަމުގައި ތަޢާރަފުކުރެވޭނެ ކަމަށް ވިދާޅުވެފައިވެއެވެ.
“ރައްޔިތުންނާ އެކު” ޕޮޑްކާސްޓްގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، މި ފިޔަވަޅުތަކުގެ މައިގަނޑު މަޤްޞަދަކީ ޒުވާނުންގެ މުޅި ޙަޔާތް ދުންފަތުގެ އިސްތިޢުމާލުން ދުރުކޮށް، ޞިއްޙަތަށް ފައިދާހުރި ދިރިއުޅުމަކަށް މަގުފަހިކޮށްދިނުން ކަމުގައެވެ. އަދި މިކަމާ ގުޅޭ އިތުރު ތަފްޞީލު ކުރިއަށް އޮތް ތަނުގައި ހިއްސާކުރައްވާނެ ކަމަށްވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ އިތުރަށް ވިދާޅުވީ، “ޖެނެރޭޝަން ބޭން” ގެ ދަށުން އެޅޭ ފިޔަވަޅުތަކުގެ އަމާޒަކީ ޚާއްޞަކޮށް 18 އަހަރު ފުރި، ދުންފަތުގެ އިސްތިޢުމާލުކުރުމަށް އަލަށް ހުށަހެޅޭ ޒުވާނުން ކަމަށެވެ. މި ފިޔަވަޅުތަކަކީ ދުނިޔޭގެ އެހެން ޤައުމުތަކުގައިވެސް ތަންފީޛުކުރަމުންދާ، ދުންފަތުގެ އިސްތިޢުމާލުކުރުމުން ޒުވާނުން ދުރުކުރުމަށް އަޅާ ފިޔަވަޅުތަކެކެވެ.
މީގެ އިތުރުން، ރައީސުލްޖުމްހޫރިއްޔާ ވަނީ ސަރުކާރުގެ އަމާޒަކީ ރައްޔިތުންނަށް ދުޅަހެޔޮ ދިރިއުޅުމެއް ކަށަވަރުކޮށްދިނުން ކަމުގައި ފާހަގަކުރައްވާފައެވެ. މި ގޮތުން، ތަރުކާރީއާއި މޭވާގެ ބާވަތްތައް އަގުހެޔޮކޮށް ލިބޭނެ މަގު ތަނަވަސްކޮށްދިނުމަށް ސަރުކާރުން މަސައްކަތްކުރައްވާނެ ކަމަށްވެސް އެމަނިކުފާނު ވިދާޅުވެފައިވެއެވެ.
ކިޔުންތެރިންގެ ހިޔާލު