ދިވެހިރާއްޖޭގައި އިމިގްރޭޝަންގެ ޚިދުމަތް ފެށިތާ މިއަހަރު 75 އަހަރު ފުރިގެންދާއިރު، މި އުފާވެރި މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އިމިގްރޭޝަންގެ އެންމެހައި ޚިދުމަތްތެރިންނަށް ޚާއްސަ ޝުކުރެއް އަރިސްކުރައްވާފައެވެ.
އިމިގްރޭޝަންގެ ޚިދުމަތް ދިވެހިރާއްޖެއިން ލިބެން ފެށިތާ 75 އަހަރު ފުރޭ އަލިމަަސް ޔޫބީލްގެ މުނާސަބަތުގައި، މި ދާއިރާގައި ކުރީން މަސައްކަތްކޮށްދެއްވި، އަދި މިހާރުވެސް މަސައްކަތުގައި ދެމިތިއްބެވި ހުރިހާ ޚިދުމަތްތެރީންނަށް މަރްޙަބާއާއި ޝުކުރު ދަންނަވަން. pic.twitter.com/JkiuyTtAZW
— Dr Mohamed Muizzu (@MMuizzu) March 24, 2025
ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ، އިމިގްރޭޝަންގެ ޚިދުމަތް ދިވެހިރާއްޖެއިން ލިބެން ފެށިތާ 75 އަހަރު ފުރޭ އަލިމަސް ޔޫބީލްގެ މުނާސަބަތުގައި، އެ ދާއިރާގައި ކުރީން މަސައްކަތްކޮށްދެއްވި އަދި މިހާރުވެސް މަސައްކަތުގައި ދެމިތިއްބެވި އެންމެހައި ޚިދުމަތްތެރިންނަށް މަރުޙަބާއާއި ޝުކުރު ދަންނަވާ ކަމަށެވެ.
ދިވެހިރާއްޖޭގައި އިމިގްރޭޝަންގެ ޚިދުމަތް އެންމެ ފުރަތަމަ ފެށިފައިވަނީ 1950 ވަނަ އަހަރުއެވެ. އެ ދުވަސްވަރު “މޯލްޑިވިއަން ޕާސް” ގެ ނަމުގައި ދަތުރުކުރުމަށް ޚާއްސަ ލިޔުމެއް ދޫކުރަން ފަށައި، މި ލިޔުން ބޭނުންކުރަން ފެށިފައިވަނީ ދިވެހިރާއްޖެއާއި ސިލޯނާ ދެމެދު ވިޔަފާރީގެ ބޭނުމަށެވެ.
އޭގެ ފަހުން، 1964 ވަނަ އަހަރު ދިވެހި ޕާސްޕޯޓް ތަޢާރަފުކުރެވި، އިމިގްރޭޝަންގެ ޚިދުމަތް އިތުރަށް ފުޅާކުރެވުނެވެ. މިހާރު ދިވެހިރާއްޖޭގައި ބޭނުންކުރަމުންދަނީ 2016 ވަނަ އަހަރު ތަޢާރަފުކުރެވުނު ދެވަނަ ޖީލުގެ އިލެކްޓްރޯނިކް ޕާސްޕޯޓެވެ.
މި 75 އަހަރުގެ ތެރޭގައި އިމިގްރޭޝަންގެ ޚިދުމަތް ވަނީ ފާހަގަކޮށްލެވޭ ކުރިއެރުންތަކެއް ހޯދާފައެވެ. މި ދާއިރާގެ ތަރައްޤީއަށް މަސައްކަތްކޮށްދެއްވި އެންމެހައި ފަރާތްތަކުގެ އަގުވަޒަންކުރުމަކީ މުހިންމު ކަމެކެވެ.
