ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ވެލާނާ އިންޓަރނޭޝަނަލް އެއަރޕޯޓް (ވީއައިއޭ)ގެ އައު ފަސިންޖަރު ޓާމިނަލްގެ މަސައްކަތުގެ ޙާލަތު ވަޒަންކުރެއްވުމަށް މިއަދު ވަޑައިގެންނެވިއެވެ.
މި ޒިޔާރަތުގައި ރައީސުލްޖުމްހޫރިއްޔާއާއެކު ވަޒީރުންނާއި ރައީސް އޮފީހުގެ އިސް ބޭފުޅުންނާއި ސަރުކާރުގެ އެހެނިހެން އިސް މަޤާމުތަކުގައި ތިއްބެވި ބޭފުޅުން ބައިވެރިވެ ވަޑައިގެންނެވިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ފަރާތުން އެ ކުންފުނީގެ ޗީފް އެގްޒެކެޓިވް އޮފިސަރ އަދި މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދާއި، ޑެޕިއުޓީ މެނޭޖިންގ ޑިރެކްޓަރުންކަމުގައިވާ މުޖްތަބާ ލަޠީފާއި މުޙައްމަދު ލަމްޢާންގެ އިތުރުން އެ ކުންފުނީގެ އެކި ޑިޕާޓްމަންޓްތަކުގެ އިސްވެރިން މި ޒިޔާރަތުގައި ބައިވެރިވެ ވަޑައިގެންނެވިއެވެ.
އެމްއޭސީއެލްއިން މިއަދު ހާމަކުރެއްވި ގޮތުގައި، އަންނަ އޮކްޓޯބަރު މަހު ޚިދުމަތްުމަތް ފެށުމަށް ނިންމާފައިވާ އައު ޓާމިނަލްގެ މަސައްކަތް ދަނީ އަވަސް ދުވެއްޔެއްގައި ކުރިއަށެވެ. ރައީސުލްޖުމްހޫރިއްޔާގެ މި ޒިޔާރަތުގައި ޓާމިނަލްގެ މުހިންމު ސަރަޙައްދުތަކަށް ވަޑައިގެން، މަސައްކަތުގެ ކުރިއެރުމާއި ރޭވިފައިވާ ޕްލޭންތަކާ ބެހޭ މަޢުލޫމާތު ސާފުކުރެއްވިއެވެ.
އަހަރަކު 7 މިލިއަން ފަސިންޖަރުންނަށް ޚިދުމަތް ދެވޭ ގޮތަށް ފަރުމާކޮށްފައިވާ މި އައު ޓާމިނަލަކީ ވީއައިއޭގައި ދިމާވެފައިވާ ޖާގައިގެ ދަތިކަން ޙައްލުކޮށް، ދަތުރުވެރިންނަށް ދެވޭ ޚިދުމަތް އިތުރަށް ފުރިހަމަކުރުމަށް މަގުފަހިކޮށްދޭނެ ޒަމާނީ ވަސީލަތްތަކުން ފުރިހަމަ ޓާމިނަލެކެވެ. މި ޓާމިނަލް ޑިޒައިންކޮށްފައިވަނީ ދިވެހިރާއްޖޭގެ ޤުދުރަތީ ރީތިކަމާއި، ތާރީޚާއި، ސަޤާފަތް ރަމްޒުކޮށްދޭ ގޮތަށްކަމަށް އެމްއޭސީއެލްއިން ފާހަގަކުރެއްވިއެވެ.
ޖުމްލަ 72,000 އަކަފޫޓުގެ ބޮޑުމިނުގެ މި ޓާމިނަލްގައި 47 ޗެކް-އިން ކައުންޓަރާއި، 6 ސެލްފް-ސަރވިސް ކިއޮސްކާއި، އެންމެ ޒަމާނީ ބެގޭޖް ހޭންޑްލިންގ ސިސްޓަމަކާއި، އެޑްވާންސްޑް ސެކިއުރިޓީ ސްކްރީނިންގ ނިޒާމެއް ޤާއިމުކުރުމަށް ވަނީ ހަމަޖެހިފައެވެ.
އެމްއޭސީއެލްއިން އިތުރަށް ފާހަގަކުރެއްވި ގޮތުގައި، މި އައު ޓާމިނަލްގެ ސަބަބުން ވީއައިއޭގެ ޚިދުމަތުގެ ފެންވަރު އިތުރަށް ރަނގަޅުވެ، ޤައުމުގެ އިޤްތިޞާދަށް ފާހަގަކުރެވޭ ކުރިއެރުމެއް ލިބިގެންދާނެއެވެ.
