ސަރުކާރުގެ ދެ ކުންފުންޏަކާ ހަތް ރަށެއްގެ ކުޅިވަރު މަޝްރޫޢުތައް ހަވާލުކޮށްފިއެވެ.
މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން މިއަދު ހާމަކުރި ގޮތުގައި، ބ. ދަރަވަންދޫ، ބ. ތުޅާދޫ އަދި ރ. މީދޫގެ ފުޓުބޯޅަ ދަނޑުތަކަށް ބޭނުންވާ ޑްރޭގް ބްރަޝް މެޝިނާއި ބެންޗުތައް ހޯދުމަށްޓަކައި ފެނަކަ ކޯޕަރޭޝަނާއެކު އެއްބަސްވުމެއްގައި ސޮއިކުރެވިފައިވެއެވެ.
މިނިސްޓްރީން އިތުރަށް ފާހަގަކުރި ގޮތުގައި، ކުޅިވަރު މަޝްރޫޢުތައް ލަސްވަމުންދާ ރަށްތައް ދެނެގަނެ، އެކަމަށް އަވަސް ހައްލެއް ހޯދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވަމުންދާ މަސައްކަތްޕުޅުގެ ދަށުން، ފެނަކައާ ހަވާލުކުރެވުނު މަޝްރޫޢުތައް މި އަހަރުގެ ދެވަނަ ކުއާޓަރގެ ތެރޭގައި ނިންމުމަށް ވަނީ ހަމަޖެހިފައެވެ.
މީގެއިތުރުން، އދ. ހަންޏާމީދޫ އަދި އއ. މާޅޮހުގެ ފުޓުބޯޅަ ދަނޑުތައް ތަރައްޤީކުރުމާއި، އއ. ތޮއްޑޫގެ އިންޑޯ ބެޑްމިންޓަން ކޯޓު ނިންމުމާއި،މާއި، ކ. ކާށިދޫގެ ފުޓުބޯޅަ ދަނޑަށް ބޭނުންވާ ޑްރޭގް ބްރަޝް މެޝިން ހޯދުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ މިއަދު ހަވާލުކުރެވިފައިވާކަން މިނިސްޓްރީން ހާމަކޮށްފައިވެއެވެ.
މިނިސްޓްރީން އިތުރަށް ފާހަގަކޮށްފައިވަނީ، ދައުލަތުގެ ކުންފުނިތަކާ ހަވާލުކޮށްގެން ކުޅިވަރުގެ މަޝްރޫޢުތައް ފުރިހަމަކުރުމަށް ރައީސުލްޖުމްހޫރިއްޔާ ވަޢުދުވެވަޑައިގެންނެވިތާ އެންމެ މަހެއްހާ ދުވަހުގެ ތެރޭގައި މި މަޝްރޫޢުތައް ހަވާލުކުރެވިފައިވާ ކަމަށެވެ.
ކިޔުންތެރިންގެ ހިޔާލު