ކޮވިޑް ތެރޭގައި ރާއްޖެއަށް ބޭނުންވާ ވެންޓިލޭޓަރުތައް ރާއްޖެއަށް ފޯރުކޮށްދީފައި ނުވާ މައްސަލައިގައި ހިމެނޭ މީހުންގެ މައްޗަށް މަކަރާއި ހީލަތް ހެދުމުގެ ދައުވާކޮށްދިނުމަށް އެދި ޕްރޮސިކިއުޓާ ޖެނެރަލް (ޕީޖީ)އަށް ހުށަހަޅަން ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސްކޮށްފިއެވެ.
ކޮވިޑް ތެރޭގައި ރާއްޖެއަށް ބޭނުންވާ ވެންޓިލޭޓަރު ގެންނަން ހަވާލުކުރި ދުބާއީގެ އެގްޒެކިއުޓާސް ކުންފުނިން ފައިސާ ނެގުމަށްފަހު ވެންޓިލޭޓަރުތައް ރާއްޖެއަށް ފޯރުކޮށްދީފައި ނުވާ މައްސަލަ ކޮމިޓީއަށް ހުށަހެޅުއްވީ ރައްޔިތުންގެ މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހުމަދު ނާޒިމެވެ.
ކޮމިޓީގެ މިއަދުގެ ބައްދަލުވުމުގައި ވާހަކަދައްކަވަމުން ނާޒިމް ވިދާޅުވީ، ދުބާއީގެ އެގްޒެކިއުޓާސް ކުންފުނިން އެ ފައިސާ ހޯދުމުގައި އެއްވެސް ކުރިއެރުމެއް ލިބިފައިނުވާ ކަމަށާއި އެހެންކަމުން އެ ފައިސާއަކީ މަދަނީގޮތުން އާބިޓްރޭޝަން މެދުވެރިކޮށް މަސައްކަތްކޮށްގެން ލިބިދާނެ ފައިސާއެއް ކަމަށް ނުބެލެވޭ ކަމަށެވެ.
އެ މައްސަލައަކީ ފުލުހުންގެ މެންޑޭޓްގައި ހިމެނޭ މައްސަލައެއް ކަމަށާއި ފުލުހުންނަށް އެކަމާބެހޭ ތަހުގީގު ކުރިއަށް ގެންދެވޭނެ ކަމަށް ޕީޖީ ލަފާދެއްވާފައިވާ ކަމަށްވެސް ނާޒިމް ވިދާޅުވިއެވެ.
“އެހެންކަމުން ގާނޫނީ އެހީތެރިކަން ބަދަލުކުރެވޭ ގާނޫނުގައި ބަޔާންކުރާ ގޮތަށް މި މައްސަލަ ތަހުގީގުކޮށް މި މީހުންނާ ދޭތެރޭގައި މަކަރާއި ހީލަތް ހެދުމުގެ ދައުވާކޮށްދިނުމަށް ޕީޖީއަށް ހުށަހަޅަން،” ހުށަހެޅުން ހުށަހަޅުއްވަމުން ނާޒިމް ވިދާޅުވިއެވެ.
ކެލާ ދާއިރާގެ މެންބަރު އަބުދުﷲ ޝަރީފާއި ހަނިމާދޫ ދާއިރާގެ މެންބަރު އަބްދުލްގަފޫރު މޫސާ ތާއީދުކުރެއްވި ނާޒިމްގެ އެ ހުށަހެޅުއްވުން ވަނީ ކޮމިޓީން ފާސްކޮށްފައެވެ.
ކިޔުންތެރިންގެ ހިޔާލު