ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވެފައިވާ ގޮތުގައި، ކައިރި މުއްދަތެއްގައި ކަރަންޓު ދެ ބިލެއް ފޮނުވާފައިވަނީ ކަސްޓަމަރުންގެ މަސްލަހަތު ރައްކާތެރިކުރުމަށްޓަކައެވެ.
ސްޓެލްކޯއިން ނިންމާފައިވަނީ ރަމަޟާން މަހު ކޮންމެ ގޭބިސީއެއްގެ ކަރަންޓު ބިލުން މަދުވެގެން 10 އިންސައްތައިގެ ޑިސްކައުންޓެއް ދިނުމަށެވެ. މި ޑިސްކައުންޓު ދެވޭނީ ހަމައެކަނި ރަމަޟާން މަހު ބޭނުންކުރެވުނު ކަރަންޓަށް ކަމަށާއި، އެ މަހަށް ވަކިން ކަރަންޓު ރީޑިންގ ނަގައި ވަކި ބިލެއް ތައްޔާރުކުރެވޭނެ ކަމަށް ސްޓެލްކޯއިން މަޢުލޫމާތު ދީފައިވެއެވެ.
ފަހުމީ އިތުރަށް ފާހަގަކުރެއްވި ގޮތުގައި، ސްޓެލްކޯއަކީ 75 އަހަރުގެ ޤައުމީ ޚިދުމަތުގެ ރެކޯޑެއް އޮތް ކުންފުންޏެއް ކަމަށާއި، އެ ކުންފުނިން އެއްވެސް ކަމެއް ރައްޔިތުންނަށް އޮޅުވާލުމުގެ ނިޔަތުގައި ނުކުރާނެކަމުގެ ފުރިހަމަ ޔަޤީންކަން އަރުވައެވެ. ރަމަޟާން މަހުގެ ބިލު ވަކިކުރުމަށް ނިންމައި، ފެބްރުއަރީ މަހުގެ ބިލު ފޮނުވުމަކީ ކުންފުނީގެ ޚިދުމަތް ހޯދާ ކަސްޓަމަރުންގެ މަސްލަހަތަށްޓަކައި ނިންމި ނިންމުމެކެވެ.
ފަހުމީ އިތުރަށް ވިދާޅުވެފައިވަނީ، ކަސްޓަމަރުންނަށް ކުރިމަތިވެދާނެ މާލީ ދަތިކަން ފިލުވުމަށްޓަކައި، ޖޫރިމަނާ ނާރާގޮތަށް މި ބިލު ދެއްކުމަށް 30 ދުވަހުގެ މުއްދަތެއްވެސް ދީފައިވާ ކަމަށެވެ. މީގެ އިތުރުން، ރަމަޟާން މަހުގެ ފުރަތަމަ ދުވަހުން ފެށިގެން ރަމަޟާން މަސް ނިމެންދެން އެއް ބިލެއްގެ ގޮތުގައި މުޅި ރަމަޟާން މަހުގެ ބޭނުންކުރުމަށް ބިލެއް ތައްޔާރުކޮށް، ސަރުކާރުން ދޭން ނިންމާފައިވާ ޑިސްކައުންޓު އެ ބިލުގައި ހިމެނުމަކީވެސް މި ނިންމުމުގެ މަޤްޞަަޤްޞަދުތަކުގެ ތެރޭގައި ހިމެނޭ ކަމެކެވެ.
ކިޔުންތެރިންގެ ހިޔާލު