މި އަހަރު ފެށިގެންދާ ބޯހިޔާވަހިކަމުގެ މަޝްރޫޢުތަކުގެ ސަބަބުން މާލޭގެ ރައްޔިތުންނަށް ގެދޮރުވެރިކަން ކަށަވަރުވެގެންދާނެ ކަމަށާއި، އެހެންކަމުން ފުލެޓް ނުލިބުނު ފަރާތްތަކުން ވެސް ހިތްވަރު ދޫނުކޮށް ކެތްތެރިކަމާއެކު މަޑުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިލްތިމާސްކުރައްވައިފިއެވެ.
ސަރުކާރުން ތަރައްޤީކުރި އިއްޒުއްދީން ފާލަން ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން، ރައީސުލްޖުމްހޫރިއްޔާ ވިދާޅުވީ، މިއަދު ޢާންމުކުރެވުނު ފުލެޓް ލިބޭ ފަރާތްތަކުގެ ލިސްޓުގައި ނުހިމެނުނު ފަރާތްތަކުން ކަންބޮޑުނުވުމަށް އެދިވަޑައިގަންނަވާ ކަމަށެވެ. އަދި މި އަހަރުތެރޭ ފެށިގެންދާ ބޯހިޔާވަހިކަމުގެ ބޮޑެތި މަޝްރޫޢުތަކާއެކު މާލޭގެ ރައްޔިތުންނަށް ގެދޮރުވެރިކަން ޔަޤީންކުރެވިގެންދާނެ ކަމަށް އެމަނިކުފާނު ވިދާޅުވިއެވެ.
މިގޮތުން، މި އަހަރުތެރޭ ހުޅުމާލޭގައި އެތައް ހާސް ބޯހިޔާވަހިކަމުގެ މަޝްރޫޢުތަކެއް ފެށުމަށް ނިންމާފައިވާ ކަމަށާއި، އޭގެ އިތުރުން ވިލިމާލެ އަދި ގުޅިފަޅުގައި ވެސް ގިނަ އަދަދެއްގެ ބޯހިޔާވަހިކަމުގެ މަޝްރޫޢުތަކެއް ކުރިއަށްދާނެ ކަމަށް ރައީސުލްޖުމްހޫރިއްޔާ ހާމަކުރެއްވިއެވެ.
މީގެއިތުރުން، ގިރާވަރު ފަޅު ހިއްކުމުގެ މަސައްކަތް ނިމި، އަދި މި އަހަރު ފެށުމަށް ހަމަޖެހިފައިވާ އުތުރު ތިލަފަޅުގެ މަޝްރޫޢު ނިމުމުން، އެ ސަރަޙައްދުތަކުގައި ވެސް ބޯހިޔާވަހިކަމުގެ މަޝްރޫޢުތައް ކުރިއަށްދާނެ ކަމަށާއި، ރަސްމާލޭގައި ވެސް ފުލެޓާއި ގޯތި ދޫކުރުމުގެ މަސައްކަތް ކުރިއަށްދާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.
އެމަނިކުފާނު އިތުރަށް ވިދާޅުވީ، މި މަޝްރޫޢުތައް ނިމުމުން 18 އަހަރުން މަތީގެ ހުރިހާ ރައްޔިތުންނަށް ބޯހިޔާވަހިކަން ކަށަވަރުކޮށްދެވޭނެ ކަމަށެވެ.
ކިޔުންތެރިންގެ ހިޔާލު