މުލަކަތޮޅު ރަތްމަންދޫގެ ރައްޔިތުން އެހެން ރަށަކަށް ބަދަލުވުމަށް އެދިފައިވާ ކަމަށާއި، އެކަމުގެ މަސައްކަތް އަވަހަށް ފެށޭނެ ކަމަށް ސިޓީތަކާއި އިދާރީ ދާއިރާތައް ހިންގުމާއި ބެހޭ ވަޒީރު އާދަމް ޝަރީފް ވިދާޅުވެއްޖެއެވެ.

ވަޒީރު އާދަމް ޝަރީފް މިހެން ވިދާޅުވީ، އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވަރކް މަޝްރޫޢުގެ ދަށުން އިމާރާތްކޮށްފައިވާ ފެރީ ސްޓޮޕްތައް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއާ ހަވާލުކުރުމަށް މިދިޔަ ބުދަދުވަހު ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

މިނިސްޓްރީގެ ސީނިއަރ ޓީމެއް އެ ރަށަށް ޒިޔާރަތްކޮށް ސާވޭއެއް ހަދާނެ ކަމަށްވެސް މިނިސްޓަރު ވިދާޅުވިއެވެ.

“މިހާރު އަޅުގަނޑުމެންނަށް ރައީސުލްޖުމްހޫރިއްޔާގެ އޮފީހުން އިރުޝާދު ލިބިފައި އެބަ އޮތް ރަތްމަންދޫގެ ރައްޔިތުން ދިރިއުޅެމުންދާނީ ކޮންތަނެއްގައިތޯ ނުވަތަ އެބޭފުޅުން ހިޖުރަކުރަން ބޭނުންވާ ޗޮއިސްތަކަކީ ނުވަތަ އޮޕްޝަންތަކަކީ ކޮބާތޯ ބެލުމުގެ މަސައްކަތް އަޅުގަނޑުމެންނަށް ހަވާލުކުރެވިފައިވޭ. އިރާދަކުރެއްވިއްޔާ އަޅުގަނޑުމެންގެ މިނިސްޓްރީގެ ސީނިއަރ ޓީމެއް އެ ރަށަށް ޒިޔާރަތްކޮށް ރައްޔިތުންގެ ވިސްނުން ހުރި ގޮތުގެ ސާވޭއެއް ހަދާނަން.” ވަޒީރު އާދަމް ޝަރީފް ވިދާޅުވިއެވެ.

171 މީހުންގެ އާބާދީއެއް އޮންނަ ރަތްމަންދޫއަކީ ރާއްޖޭގެ އެންމެ އާބާދީ ކުޑަ ރަށްތަކުގެ ތެރެއިން ރަށެކެވެ.

އާބާދީ އާއި ތަރައްގީ އެއްފަސްކޮށް ރައްޔިތުންނަށް ފާގަތި ދިރިއުޅުމެއް ހޯދައިދިނުމަކީ ރައީސް މުއިއްޒުގެ ތަސައްވުރެކެވެ.