އެކްސްޕެޓް ސިސްޓަމް މައްސަލައިގައި ކުރީގެ ސަރުކާރުގެ އިސްވެރިންގެ މައްޗަށް ޖިނާއީ ތަޙްޤީޤެއް ހިންގުމަށް ހުށަހަޅުއްވާނެ ކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.
ރައްޔިތުންގެ މަޖިލީހުގައި ވަޒީރުގެ އިތުބާރު ނެތްކަމުގެ މައްސަލައަށް ޖަވާބުދާރީވަމުން، އެކްސްޕެޓް ސިސްޓަމާ ގުޅޭގޮތުން ކުރީގެ ސަރުކާރުން ޢަމަލުކޮށްފައިވާ ގޮތުގެ ތަފްޞީލު ވަޒީރު ހާމަކުރެއްވިއެވެ. މިގޮތުން، 2016 ވަނަ އަހަރު މެލޭޝިއާގެ ބެސްޓިނެޓް ކުންފުންޏާއެކު ވެފައިވާ އެއްބަސްވުމުގެ ދަށުން، އެ ކުންފުނިން 13.4 މިލިއަން ޑޮލަރު އިންވެސްޓްކުރަން ޖެހޭކަމަށް ވަޒީރު ފާހަގަކުރެއްވިއެވެ.
ވަޒީރު އިތުރަށް ވިދާޅުވީ، 2019 އިން ފެށިގެން އެ ކުންފުނިން މިކަމާ ގުޅޭގޮތުން ސަރުކާރުގެ އިދާރާތަކާ މުޢާމަލާތްކުރަމުން ދިޔަ ނަމަވެސް، އެކަށީގެންވާ ޖަވާބެއް ނުދީ 2022 ވަނަ އަހަރާ ހަމައަށް ދިޔަކަމަށެވެ. މި މައްސަލައިގައި ދައުލަތަށް ގެއްލުންވާ ގޮތަށް ޢަމަލުކޮށްފައިވާތީ، ކުރީގެ ސަރުކާރުގެ އިސްވެރިންގެ މައްޗަށް ޖިނާއީ ތަޙްޤީޤެއް ހިންގުމަށް އެންޓި-ކޮރަޕްޝަން ކޮމިޝަނަށް ހުށަހަޅުއްވާނެ ކަމަށް ވަޒީރު ވިދާޅުވިއެވެ.
އައު ސިސްޓަމް ޤާއިމްކުރެވުމުން ދިވެހި ދައުލަތަށް 1.3 ބިލިއަން ރުފިޔާ ލިބޭނެ ކަމަށް ވަޒީރު ލަފާކުރައްވާ ކަމަށާއި، މިހާރު ހުރި ސިސްޓަމުން އެވްރެޖްކޮށް އަހަރަކު 770 މިލިއަން ރުފިޔާ ލިބޭ ކަމަށްވެސް ވަޒީރު ފާހަގަކުރެއްވިއެވެ.
