ދ. ކުޑަހުވަދޫގައި ކޮމާޝަލް ބަނދަރެއް ގާއިމުކުރުމުގެ މަސައްކަތް މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ހަވާލުކޮށްފިއެވެ. މި މުހިންމު މަޝްރޫޢުގެ އެއްބަސްވުމުގައި ސޮއިކުރެއްވީ އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސައީދާއި އެމްޕީއެލްގެ ސީއީއޯ މުޙައްމަދު ރިޝްވާނެވެ.
މި ބަނދަރުގެ މައިގަނޑު އަމާޒަކީ ޕޯޓް-ޓު-ޕޯޓް ލޮޖިސްޓިކްސް ޚިދުމަތް ފޯރުކޮށްދިނުމެވެ. އެމްޕީއެލުން މި ބަނދަރު ތަރައްޤީކުރާއިރު، އެކި ބާވަތުގެ ވިޔަފާރި ޚިދުމަތްތައް ލިބޭނެ ގޮތަށް ފަރުމާކުރުމަށް ވަނީ ނިންމާފައެވެ. މީގެ އިތުރުން ކުރިމަގުގައި ކުޑަހުވަދޫގައި ބޮންޑަޑް ވެއަރހައުސްއެއް ގާއިމުކޮށް އިތުރު ޚިދުމަތްތައް ތަޢާރަފުކުރުމަކީވެސް އެމްޕީއެލްގެ ވިސްނުމެއްކަމަށް އެ ކުންފުނިން ހާމަކޮށްފައިވެއެވެ.
ކުޑަހުވަދޫއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާބަން ސެންޓަރުތައް ތަރައްޤީކުރުމަށް ކަނޑައަޅުއްވާފައިވާ ހަތް ރަށުގެ ތެރޭގައި ހިމެނޭ ރަށެކެވެ. މި ބަނދަރު ތަރައްޤީކުރުމާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވެފައިވަނީ، މިއީ އަބަދުވެސް ދެކެވޭ ވާހަކައެއް ނަމަވެސް މިހާތަނަށް އެއްވެސް ސަރުކާރަކުން މި މަޝްރޫޢު ޙަޤީޤަތަކަށް ހެދުމަށް މަސައްކަތްކޮށްފައި ނުވާކަމަށެވެ.
ރައީސް މުޢިއްޒު އިތުރަށް ފާހަގަކުރެއްވި ގޮތުގައި، މި ބަނދަރު ތަރައްޤީވުމުން އޭގެ ނަފާއާއި އިޤްތިޞާދީ ކުރިއެރުން ރައްޔިތުންނަށް ލިބިގެންދާނެއެވެ. އަދި އާބާދީ އެއްފަސްކުރުމުގެ ސިޔާސަތުގެ ދަށުން އެ ރަށަށް ހިޖުރަކުރަން ބޭނުންވާ ފަރާތްތަކަށް އެ ފުރުސަތު ދީ، ރަށުގައި އިތުރު ހައުސިންގ މަޝްރޫޢުތައް ހިންގާނެ ކަމުގެ ޔަޤީންކަންވެސް ރައްޔިތުންނަށް ދެއްވާފައިވެއެވެ.
