ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ދ. ބަނޑިދޫގައި ދެ މުހިންމު މަޝްރޫޢެއް ރަސްމީކޮށް ފައްޓަވައިދެއްވައިދެއްވައިފިއެވެ. މިގޮތުން، ސަރުކާރުން އެ ރަށުގައި ގާއިމުކުރުމަށް ނިންމަވާފައިވާ އައިސްޕްލާންޓުގެ ބިންގާ އެޅުއްވުމާއި، ބޭންކް އޮފް މޯލްޑިވްސްއިން ގާއިމުކޮށްފައިވާ އޭޓީއެމްގެ ޚިދުމަތް ރަސްމީކޮށް ފައްޓަވައިދެއްވާފައިވެއެވެ.

ރައީސުލްޖުމްހޫރިއްޔާ ދ. އަތޮޅުގެ މީހުން ދިރިއުޅޭ ހުރިހާ ރަށަކަށް ކުރައްވަމުންދާ ތިން ދުވަހުގެ ދަތުރުފުޅުގެ ތެރެއިން، މިއަދު ބަނޑިދޫއަށް ވަޑައިގަތުމުން، އެ ރަށުގެ ރައްޔިތުން ވަރަށް ހޫނު މަރުޙަބާއެއް ދަންނަވާފައިވެއެވެ.

އައިސްޕްލާންޓުގެ ބިންގާ އެޅުއްވުމުގެ ރަސްމިއްޔާތުގައި، މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމާއި މިފްކޯގެ ސީއީއޯ ޑރ. ވިތާލީ ލިޔުބޮމިވް ބައިވެރިވެވަޑައިގެންނެވިއެވެ. މި އައިސްޕްލާންޓަކީ ދުވާލަކު 30 މެޓްރިކް ޓަނުގެ އައިސް ފްލޭކްސް އުފެއްދުމުގެ ޤާބިލުކަން ލިބިފައިވާ، އަދި 50 މެޓްރިކް ޓަނުގެ އައިސް ރައްކާކުރެވޭނެ ޕްލާންޓެކެވެ. މި މަޝްރޫޢުގެ މަސައްކަތް 240 ދުވަހުގެ ތެރޭގައި ނިންމުމަށް ވަނީ ރޭވިފައެވެ.

މީގެ އިތުރުން، ރައީސުލްޖުމްހޫރިއްޔާގެ އިސްނެންގެވުމަށް ބޭންކް އޮފް މޯލްޑިވްސްއިން ރާއްޖޭގެ ހުރިހާ ރަށެއްގައި އޭޓީއެމް ގާއިމުކުރުމުގެ މަޝްރޫޢުގެ ދަށުން، ބަނޑިދޫގައި ގާއިމުކުރެވުނު އޭޓީއެމްގެ ޚިދުމަތް ވެސް މިއަދު ރަސްމީކޮށް ފައްޓަވައިދެއްވާފައިވެއެވެ. މި ރަސްމިއްޔާތުގައި ބީއެމްއެލްގެ ސީއީއޯ މުޙައްމަދު ޝަރީފާއި، ބީއެމްއެލްގެ ޑިރެކްޓަރުންގެ ބޯޑުގެ ޗެއަރމަން އަދި އެ ކުންފުނީގެ އެހެނިހެން އިސްވެރިން ބައިވެރިވެވަޑައިގެންނެވިއެވެ.