ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅުތަކުގެ ތެރޭގައި ހިމެނޭ ފަސް މިލިއަން ގަސް އިންދުމުގެ ޕްރޮގްރާމުގައި ބައިވެރިވުމުގެ ގޮތުން، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެއް މިލިއަން ގަސް އިންދުމަށް ނިންމައި، އެކަމ، އެކަމުގެ ޕްލެޖްގައި ސޮއިކޮށްފިއެވެ.
މި މުހިންމު މަޝްރޫޢު ފެށުމުގެ ގޮތުން ކުޑަގިރީގައި ބޭއްވުނު ޚާއްޞަ ރަސްމިއްޔާތެއްގައި، އެއް މިލިއަން ގަސް އިންދުމުގެ ޕްލެޖްގައި ސޮއިކުރެއްވީ އެޗްޑީސީގެ މެނޭޖިންގ ޑިރެކްޓަރ އަލްފާޟިލް މުޙައްމަދު މަޢުރޫފް ޖަމީލެވެ.
މި ރަސްމިއްޔާތުގައި ވާހަކަފުޅު ދައްކަވަމުން އެމްޑީ މަޢުރޫފް ޖަމީލް ވިދާޅުވީ، “މިއީ އެޗްޑީސީގެ ބެލުމުގެ ދަށުގައިވާ ރަށްތައް ފެހިކުރުމާއެކު، ރައީސުލްޖުމްހޫރިއްޔާ އިޢުލާންކުރައްވާފައިވާ ފަސް މިލިއަން ގަސް އިންދުމުގެ ޕްރޮގްރާމުގައި ބައިވެރިވެ، އެ މަސައްކަތަށް އެޗްޑީސީން އެއްބާރުލުން ދިނުމުގެ ގޮތުން ކުރިއަށްގެންދާ ޤައުމީ މުހިންމު މަސައްކަތެއް” ކަމުގައެވެ.
މީގެއިތުރުން، މި މަޝްރޫޢަށް ބޭނުންވާ ގަސް އުފެއްދުމަށްޓަކައި އެޗްޑީސީން ވަނީ ލ. ގަމުގައި އެއްލައްކަ އަކަފޫޓުގެ ނާސަރީއެއް ޤާއިމްކުރުމަށް ނިންމާފައެވެ. މި ނާސަރީގައި އުފައްދާ ގަސްތައް ހުޅުމާލޭގެ އިތުރުން އެރުން އެޗްޑީސީގެ ބެލުމުގެ ދަށުގައިވާ ރަސްމާލެ، ކުޑަގިރި، ތިލަފުށި އަދި ގުޅީފަޅުގައި އިންދުމަށް ބޭނުންކުރެވޭނެއެވެ.
އެޗްޑީސީން މަޢުލޫމާތު ދެއްވާގޮތުގައި، މި ޕްރޮގްރާމާއެކު ހުޅުމާލެ ހިމެނޭހެން އެ ކޯޕަރޭޝަނުގެ ބެލުމުގެ ދަށުގައިވާ ރަށްތައް ފެހިކުރުމަށް ހިފާފައިވާ އަމާޒަށް ވާޞިލުވުމަށްވެސް މަގުފަހިވެގެންދާނެއެވެ.
