ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ދ. މާއެނބޫދޫ ސިއްޙީ މަރުކަޒުގެ ޚިދުމަތްތައް ފުޅާކުރުމަށް އިމާރާތްކުރެވުނު އައު ޢިމާރާތް ރަސްމީކޮށް ހުޅުއްވައިދެއްވައިފިއެވެ.
މި ރަސްމިއްޔާތު ބޭއްވުނީ ރައީސުލްޖުމްހޫރިއްޔާ ދ. އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން މާއެނބޫދޫއަށް ވަޑައިގެންނެވި ވަގުތުއެވެ. ހުޅުވުމުގެ ރަސްމިއްޔާތަށްފަހު ރައީސުލްޖުމްހޫރިއްޔާ ވަނީ އައު ޢިމާރާތް ޒިޔާރަތްކުރައްވާ ބައްލަވާލައްވާފައެވެ.
މި އައު ޢިމާރާތަކީ މާއެނބޫދޫ ސިއްޙީ މަރުކަޒުގައި ދިމާވެފައިވާ ޖާގައިގެ ދަތިކަމަށް ޙައްލެއް ހޯދައިދިނުމުގެ ގޮތުން ތަރައްޤީކުރެވުނު ޢިމާރާތެކެވެ. މި އައު ޢިމާރާތާއެކު އިތުރު 5 ޚިދުމަތެއް ވަނީ ތަޢާރަފުކުރެވިފައެވެ.
އައު ޢިމާރާތުން ފޯރުކޮށްދެވޭ ޚިދުމަތްތަކުގެ ތެރޭގައި އާންމު ސިއްޙަތުގެ ޚިދުމަތްތަކާއި، ދުންފަތުގެ އިސްތިޢުމާލުކުރާ ފަރާތްތަކަށް ބޭނުންވާ ފަރުވާގެ އިތުރުން، ގައިންގަޔަށް ނާރާ ބަލިތަކަށް ފަރުވާދިނުމަށް ޚާއްޞަ ކްލިނިކެއް، މާބަނޑު މައިންނަށް ޚާއްޞަ ކްލިނިކެއް އަދި ކުޑަކުދިންގެ ބަލިތަކަށް ފަރުވާދިނުމަށް ޚާއްޞަ ކްލިނިކެއް ހިމެނެއެވެ.
މާއެނބޫދޫ ސިއްޙީ މަރުކަޒުގެ ޖާގަ އިތުރުކުރުމުގެ މަޝްރޫޢު 2023 ވަނަ އަހަރު ވަނީ ފެށިފައެވެ. މި މަޝްރޫޢަށް 4.7 މިލިއަން ރުފިޔާ ޚަރަދުވާނެ ކަމަށް ސިއްޙަތާބެހޭ ވުޒާރާއިން ވަނީ އަންދާޒާކޮށްފައެވެ.
ކިޔުންތެރިންގެ ހިޔާލު