ރައީސުލްޖުމްހޫރިއްޔާގެ ނިންމެވުމާ އެއްގޮތަށް، އާރު.ޓީ.އެލް ފެރީ ސަރވިސްގެ ދަތުރުތައް ހއ. ތަކަންދޫ އަދި ހއ. މާރަންދޫއަށް އަންނަ އަންގާރަ ދުވަހުން ފެށިގެން ފެށުމަށް ހަމަޖެހިއްޖެ
ދަތުރުފަތުރާއި މަދަނީ އުދުހުންތަކާބެހޭ ވުޒާރާއިން އިޢުލާނުކުރައްވާފައިވާ ގޮތުގައި، އަންނަ އަންގާރަ ދުވަހުން ފެށިގެން އާރު.ޓީ.އެލް ފެރީ ސަރވިސްގެ ދަތުރުތައް ހއ. ތަކަންދޫ އަދި ހއ. މާރަންދޫއަށް ފެށުމަށް ވަނީ ހަމަޖެހިފައެވެ.
އިޖްތިމާޢީ ވިއުގަތަކުގައި ހިއްސާކުރެއްވި ޕޯސްޓެއްގައި އެ ވުޒާރާއިން ވިދާޅުވެފައިވަނީ، ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް، ހއ. އިހަވަންދޫ – ހދ. ކުޅުދުއްފުށި ރޫޓުގައި ހއ. ތަކަންދޫ އަދި ހއ. މާރަންދޫ ހިމަނާފައިވާ ކަމަށެވެ. އަދި އަންނަ އަންގާރަ ދުވަހުން ފެށިގެން މި ދަތުރުތައް ފެށުމުގެ އިންތިޒާމުތައް ވަނީ ހަމަޖެހިފައި ކަމަށް އެ ވުޒާރާއިން އިތުރަށް ވިދާޅުވިއެވެ.
ފާއިތުވި މަހު ތިލަދުންމަތީ އުތުރުބުރިއަށް ކުރެއްވި ދަތުރުފުޅުގައި ތަކަންދޫއަށް ވަޑައިގެން ދެއްކެވި ވާހަކަފުޅުގައި، ރައީސުލްޖުމްހޫރިއްޔާ ވަނީ އަންނަ ރަމަޟާން މަހުގެ ކުރިން އާރު.ޓީ.އެލް ފެރީ ސަރވިސް ތަކަންދޫ އަދި މާރަންދޫއަށްވެސް ފޯރުކޮށްދެއްވާނެ ކަމަށް ވަޢުދުވެ ވަޑައިގެންފައެވެ.
ދިވެހިރާއްޖޭގެ ރަށްތައް ދަތުރުފަތުރުގެ ނިޒާމުން ގުޅާލުމުގެ މަޝްރޫޢު ކުރިއަށްދަނީ އެމް.ޓީ.ސީ.ސީއާ ޙަވާލުކޮށްގެން، 6 ޒޯނަކަށް ބަހާލައިގެންނެވެ. އެންމެ ފަހުން މި ޚިދުމަތް ފެށުނު ނ. އަތޮޅުގައި މީހުން ދިރިއުޅޭ 13 ރަށެއްގައި މި ޚިދުމަތް ފޯރުކޮށްދެވެއެވެ. މިހާރު ރާއްޖޭގެ 9 އަތޮޅެއްގެ 81 ރަށް ވަނީ އާރު.ޓީ.އެލް ފެރީ ސަރވިސްގެ ޚިދުމަތުން ގުޅާލެވިފައެވެ. ދެން އެންމެ އަވަހަށް މި ޚިދުމަތް ފެށުމަށް ހަމަޖެހިފައިވަނީ ރ. އަދި ބ. އަތޮޅުގައެވެ. ރައީސުލްޖުމްހޫރިއްޔާ ވިދާޅުވެފައިވާ ގޮތުގައި މި ދެ އަތޮޅުގައި ޖުލައި މަސް ނިމުމުގެ ކުރިން މި ޚިދުމަތް ފެށޭނެއެވެ.
