2024 ވަނަ އަހަރަކީ ދިވެހިރާއްޖޭގެ ކުޅިވަރު ދާއިރާއަށް އިތުރު ކުރިއެރުމެއް ލިބިގެންދިޔަ އަހަރެއްގެ ގޮތުގައި ފާހަގަކުރެވޭކަމަށް މޯލްޑިވްސް އޮލިމްޕިކް ކޮމިޓީގެ ރައީސް މުޙައްމަދު ޢަބްދުއްސައްތާރު (ޗަމްޕީ) ވިދާޅުވެއްޖެއެވެ. މި ކުރިއެރުމުގައި އެތުލީޓުންނަށް ދެވުނު ސްކޮލަރޝިޕްތަކުގެ ދައުރު ވަރަށް މުހިންމުކަމަށް އެމަނިކުފާނު ފާހަގަކުރެއްވިއެވެ.
މޯލްޑިވްސް އޮލިމްޕިކް ކޮމިޓީގެ އަހަރީ އާންމު ޖަލްސާގައި ވާހަކަފުޅު ދައްކަވަމުން ޢަބްދުއްސައްތާރު ވިދާޅުވީ، 2024 ވަނަ އަހަރަކީ ދިވެހި ކުޅިވަރުގެ ތާރީޚުގައި ފާހަގަކޮށްލެވޭ އަހަރެއްކަމަށެވެ. އެގޮތުން، ޕެރިސް އޮލިމްޕިކްސްއަށް ޓޭބަލް ޓެނިސް ކުޅުންތެރިޔާ ފާޠިމަތު ދީމާ ޢަލީ ކޮލިފައިވުމާއި، ބެޑްމިންޓަން، ސްވިމިންގ އަދި އެތުލެޓިކްސްގައި ރާއްޖެއިން ބައިވެރިވެފައިވުން ޚާއްޞަކޮށް ފާހަގަކުރެއްވިއެވެ.
2024 ވަނަ އަހަރަކީ ޙަޤީޤަތުގައިވެސް ދިވެހި ކުޅިވަރުގައި ވަރަށް ޚާއްޞަ އަހަރެއް. މި އަހަރު އަގުހުރި ވަގުތުތަކަކާއި ބުރަ މަސައްކަތުން ހޯދި ފަޚުރުވެރި ކާމިޔާބީތަކަކީ ބޮޑެތި ކުރިއެރުންތަކަކުން ފުރިގެންވާ ކަމެއް – ޢަބްދުއްސައްތާރު
މި ކާމިޔާބީތަކުގައި އެންމެ މުހިންމު ދައުރެއް އަދާކުރީ އެތުލީޓުންނަށް ދެވިފައިވާ ސްކޮލަރޝިޕްތައްކަމަށް ޢަބްދުއްސައްތާރު ފާހަގަކުރެއްވިއެވެ. ޕެރިސް 2024ގެ އޮލިމްޕިކްސް ސްކޮލަރޝިޕާއި ކުޅިވަރު ވުޒާރާއިން ކުރިއަށްގެންދާ “އަރުތަ” ޕްރޮގްރާމުގެ ސްކޮލަރޝިޕްތަކުގެ ސަބަބުން ކުޅުންތެރިންގެ ހުނަރަށް ވަރަށް ބޮޑު ކުރިއެރުމެއް އައިކަމަށް އެމަނިކުފާނު ވިދާޅުވިއެވެ.
މިފަދަ ސްކޮލަރޝިޕްތަކަކީ އަޅުގަނޑުމެންނަށް ވަރަށް މުހިންމު އެއްޗެހިތަކެއް. އަޅުގަނޑުމެން އެދެނީ މިނިސްޓްރީއިން މިފަދަ ކަންތައްތަކުގައި އެތުލީޓުންނަށް އެހީތެރިކަން ދެމެހެއްޓެނިވި ގޮތެއްގައި ފޯރުކޮށްދެއްވުން- ޢަބްދުއްސައްތާރު އިތުރަށް ވިދާޅުވިއެވެ.
މީގެއިތުރުން، ކޯޗުންނާއި ކުޅިވަރުގެ ފަންނީ އަދި އިދާރީ މުވައްޒަފުން ތަމްރީނުކުރުމުގެ ރޮނގުންވެސް އެމްއޯސީއިން ގިނަ މަސައްކަތްތަކެއްކޮށް ރަނގަޅު ނަތީޖާއެއް ހޯދިކަމަށް ޢަބްދުއްސައްތާރު ފާހަގަކުރެއްވިއެވެ. އިންޓަނޭޝަނަލް ކޯޗިންގ އެންރިޗްމަންޓް ސެޓްފިކެޓް ޕްރޮގްރާމް (އައިސީސީޕީ)، އިންޓަރނޭޝަނަލް ކޯޗިންގ ކޯސް (އައިސީސީ) އަދި އެގްޒެކެޓިވް މާސްޓަރޒް އިން ސްޕޯޓްސް އޮގަނައިޒޭ ޝަން މެނޭޖްމަންޓް ފަދަ ތަމްރީނު ޕްރޮގްރާމުތަކުން ދިވެހިންނަށް ފުރުޞަތު ދެވި، އެ ކޯސްތަކުގެ ސަބަބުން ކޯޗުންނާއި ސްޕޯޓްސް އެޑްމިނިސްޓްރޭޓަރުންނަށް ބޭނުންވާ މުހިންމު މަޢުލޫމާތާއި ތަޖުރިބާ ލިބި، ރާއްޖޭގެ ކުޅިވަރުގެ ފެންވަރު އިތުރަށް މަތިވެގެން ދިޔަކަންވެސް ޢަބްދުއްސައްތާރު ފާހަގަކުރެއްވިއެވެ.
