ކުޑަގިރި ޕިކްނިކް އައިލެންޑް ހުޅުވުނުތާ 2 އަހަރު ފުރުން ފާހަގަކުރުމުގެ ގޮތުން، ރަށުގެ ޤުދުރަތީ މާޙައުލު އިތުރަށް މުއްސަނދިކުރުމަށް ހިޔާލިބޭ ބޮޑެތި ގަސް އިންދުމުގެ ޚާއްޞަ ހަރަކާތެއް ކުރިއަށް ގެންގޮސްފައިވެއެވެ.
މާލެ ސަރަޙައްދުގެ ރައްޔިތުންނަށް މުނިފޫހިފިލުވުމަށް ޚާއްޞަކޮށްގެން ތަރައްޤީކުރެވުނު ކުޑަގިރި ޕިކްނިކް އައިލެންޑް ރަސްމީކޮށް ހުޅުވާލެވުނީ 2023 ވަނަ އަހަރުގެ ފެބްރުއަރީ މަހުގެ 11 ވަނަ ދުވަހުއެވެ.
ކުޑަގިރި ބެލެހެއްޓުމުގެ ޒިންމާ އުފުލާ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މަޢުލޫމާތު ދެއްވާފައިވާ ގޮތުގައި، މި މުނާސަބަތާ ގުޅިގެން އެޗްޑީސީގެ މެނޭޖިންގ ޑިރެކްޓަރ މުޙައްމަދު މަޢުރޫފް ޖަމީލް އަދި ޗެއަރމަން އަޙްމަދު ނާޞިފްގެ އިތުރުން ކުންފުނީގެ ބޯޑު މެންބަރުން ކުޑަގިރިއަށް ޒިޔާރަތްކުރައްވައި، ހިޔާދޭ ބޮޑެތި ގަސް އިންދުމުގެ ޚާއްޞަ ހަރަކާތެއް ކުރިއަށް ގެންގޮސްފައިވެއެވެ. މި ހަރަކާތަކީ ސަރުކާރުގެ 5 މިލިއަން ގަސް އިންދުމުގެ ޕްރޮގްރާމުގެ ދަށުން ކުރިއަށް ގެންދެވުނު ހަރަކާތެއްކަން އެޗްޑީސީން ފާހަގަކުރައްވާފައިވެއެވެ.
އެޗްޑީސީގެ ތަފާސްހިސާބުތަކުން ދައްކާގޮތުގައި، ފާއިތުވި 2 އަހަރުގެ ތެރޭގައި 54,724 ފަތުރުވެރިން ކުޑަގިރިއަށް ޒިޔާރަތްކޮށްފައިވެއެވެ. އަދި ގިނަ ފަތުރުވެރިން ކުޑަގިރީގެ ތަޖުރިބާއާމެދު ހިތްހަމަޖެހުން ފާޅުކުރާކަން އެޗްޑީސީން ފާހަގަކުރައްވާފައިވެއެވެ.
ކުޑަގިރިއަކީ ފަތުރުވެރިންނަށް އިތުރަށް ހިތްފަސޭހަ ތަޖުރިބާއެއް ފޯރުކޮށްދޭ ރަށަކަށް ހެދުމަށްޓަކައި އެޗްޑީސީން ދަނީ އިތުރު މަސައްކަތްތަކެއް ކުރަމުންނެވެ. މިގޮތުން، ކުޑަގިރިއަށް ދަތުރުކުރުމާއި އެހެނިހެން އިންތިޒާމުތައް ހަމަޖެއްސުމަށް ޚާއްޞަ ކައުންޓަރެއް ހުޅުމާލޭގައި ޤާއިމުކުރެވިފައިވެއެވެ. އަދި އަންނަ އޭޕްރީލް މަހުން ފެށިގެން ކުޑަގިރީގެ ޚިދުމަތްދޭ ގަޑި ކޮންމެ ދުވަހެއްގެ ރޭގަނޑު 11:30 އަށް އިތުރުކުރުމަށްވެސް އެޗްޑީސީން ނިންމާފައިވެއެވެ.
މީގެއިތުރުން، ކުޑަގިރީގައި ޚާއްޞަ ޑައިވް ސައިޓެއް ތަރައްޤީކުރުމަށްވެސް އެޗްޑީސީން ނިންމާފައިވެއެވެ. މި މަޝްރޫޢު ކުރިއަށްދާނީ އެޗްޑީސީ، އެމްއެމްޕީއާރްސީ އަދި އެމްޓީސީސީ ގުޅިގެންނެވެ.
ކިޔުންތެރިންގެ ހިޔާލު