އިންޑިއާގެ ހައި ކޮމިޝަނަރު އެކްސެލެންސީ ޖީ ބަލަސުބްރަމާނިއަން، ދިވެހިރާއްޖޭގެ ޓޫރިޒަމް އެންޑް އެންވަޔަރަމަންޓް މިނިސްޓަރު އޮނަރަބަލް ތާރިގް އިބްރާހިމް އަދި ހެލްތު މިނިސްޓަރު އޮނަރަބަލް އަބްދުﷲ ނާޒިމްއާ މިއަދު ވަކިވަކިން ބައްދަލުކުރައްވައިފިއެވެ.
ހެލްތު މިނިސްޓްރީގެ ރަސްމީ “އެކްސް” އެކައުންޓުގައި ޝާއިޢުކުރެއްވި ޕޯސްޓެއްގައި ވިދާޅުވެފައިވަނީ، އިންޑިއާ ސަފީރު ހެލްތު މިނިސްޓަރަށް ކުރެއްވި އިޙްތިރާމުގެ ޒިޔާރަތުގައި، ޞިއްޙީ ދާއިރާއާ ގުޅުންހުރި މަޝްރޫޢުތަކާއި މުސްތަޤުބަލުގައި ގުޅިގެން މަސައްކަތްކުރުމާ ބެހޭގޮތުން މަޝްވަރާކުރެއްވި ކަމަށެވެ.
ހަމައެހެންމެ، މިނިސްޓަރު ތާރިގް އިބްރާހިމް ވެސް އެމަނިކުފާނުގެ ރަސްމީ “އެކްސް” އެކައުންޓުގައި ޕޯސްޓެއް ކުރައްވައި، އިންޑިއާ ސަފީރާ ބައްދަލުކުރެއްވުމުން އުފާކުރައްވާ ކަމަށް ވިދާޅުވެފައިވެއެވެ. މި ބައްދަލުވުމުގައި ފަތުރުވެރިކަމާއި ތިމާވެށީގެ ދާއިރާއާ ގުޅޭގޮތުން މަޝްވަރާކުރެއްވިކަމަށާއި، އިންޑިއާ ސަފީރާއެކު ގާތުން މަސައްކަތްކުރެއްވުމަށް ބޭނުންފުޅުވާކަން ވެސް ފާހަގަކުރައްވާފައިވެއެވެ.
އިންޑިއާ ސަފީރު މަޤާމާ ހަވާލުވެވަޑައިގަތުމަށްފަހު، ދިވެހިރާއްޖޭގެ އެކި ވުޒާރާތަކުގެ ވަޒީރުންނާއި ބައެއް މުއައްސަސާތަކުގެ އިސްވެރިންނާ ބައްދަލުކުރައްވަމުން ގެންދަވާކަން ފާހަގަކުރެވެއެވެ.
ކިޔުންތެރިންގެ ހިޔާލު