ދިވެހިރާއްޖޭގެ މިނިވަންކަމަށް އެއްވެސް ބާވަތެއްގެ އުނިކަމެއް އަތުވެދާނެ ކަމަކަށް ފުރުޞަތު ނުދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ އަޒުމް ކަނޑައަޅުއްވާފައެވެ. މި ވާހަކަފުޅު ރައީސް ދެއްކެވީ މިއަދު އިއްވެވި ރިޔާސީ ބަޔާނުގައެވެ.
ރައީސުލްޖުމްހޫރިއްޔާ ވިދާޅުވީ ޤައުމުގެ މިނިވަންކަމާއި އަމިއްލަވަންތަކަން ޙިމާޔަތްކުރުމަކީ އެމަނިކުފާނުގެ އެންމެ އިސް އަމާޒުކަމަށެވެ. މިކަން ޙާޞިލުކުރުމަށްޓަކައި ޤައުމީ ދިފާޢީ ބާރުތައް ހަރުދަނާކުރެއްވުމަށް ސަރުކާރުން ގިނަގުނަ މަސައްކަތްތަކެއް ކުރައްވަމުން ގެންދަވާކަމަށް ރައީސް ވިދާޅުވިއެވެ.
އެގޮތުން، އެމް.އެން.ޑީ.އެފްގެ ކޯސްޓްގާޑުގެ ޚިދުމަތް ދެގުނަ ކުރެއްވުމަށް މަސައްކަތް ފައްޓަވާފައިވާކަމަށާއި، އިތުރު އުޅަނދުފަހަރާއި މަރުކަޒުތައް ޤާއިމުކުރެއްވުމުގެ މަސައްކަތް ކުރިއަށްދާކަމަށް ރައީސް ހާމަކުރެއްވިއެވެ. މީގެއިތުރުން، ވައިގެ ދިފާޢީ ޤާބިލުކަން އިތުރުކުރެއްވުމަށް އެމް.އެން.ޑީ.އެފް އެއަރ ކޯ އުފައްދަވާފައިވާކަމަށާއި، ޑްރޯން ޓެކްނޮލޮޖީގެ ބޭނުން ހިއްޕަވަމުން ގެންދަވާކަމަށްވެސް ރައީސް ވިދާޅުވިއެވެ.
ރައީސުލްޖުމްހޫރިއްޔާ އިތުރަށް ވިދާޅުވީ ފުލުހުންގެ ޚިދުމަތް ފުޅާކުރެއްވުމަށްވެސް ސަރުކާރުން އިސްކަންދެއްވާކަމަށެވެ. މިގޮތުން މިއަހަރު ނިމޭއިރު ރާއްޖޭގެ ހުރިހާ ރަށެއްގައި ފުލުހުންގެ ޚިދުމަތް ޤާއިމުކުރެވިފައި ހުންނާނެކަމަށް ރައީސް ވަޢުދުވެވަޑައިގަތެވެ. އަދި މަސްތުވާތަކެއްޗާއި ގޭންގު ކުށްތަކާ ދެކޮޅަށް ކުރެވޭ މަސައްކަތްތައް އިތުރަށް ހަރުދަނާކުރެއްވުމަށް ފުލުހުންގެ ޤާބިލުކަން އިތުރުކުރައްވާނެކަމަށްވެސް ރައީސް ވިދާޅުވިއެވެ.
ކިޔުންތެރިންގެ ހިޔާލު