ފ. މަގޫދޫ އެއަރޕޯޓް ތަރައްޤޓް ތަރައްޤީކުރުމުގެ މަޝްރޫޢުގެ މުހިންމު ބައިތަކެއް ނިމުމަކާ ކައިރިވެފައިވާކަމަށް މަޝްރޫޢުގެ ކޮންޓްރެކްޓަރ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ.
2023 ވަނަ އަހަރުގެ ފެށުމުގައި ފަށާފައިވާ މި މަޝްރޫޢުގެ މަސައްކަތް، ވަގުތީ މެދުކެނޑުމަކަށްފަހު، މިދިޔަ އަހަރުގެ ޖުލައި މަހު އަލުން ފެށުނެވެ.
އެމްޓީސީސީގެ މަޢުލޫމާތުގައިވާ ގޮތުން، ރަންވޭގެ އޭބީސީ ލޭޔަރގެ 56 އިންސައްތަ އަދި ޓަރމިނަލް އިމާރާތުގެ 53 އިންސައްތަ މަސައްކަތް ވަނީ ނިމިފައެވެ. އަދި ފަޔަރ ބިލްޑިންގގެ 24 އިންސައްތަ މަސައްކަތްވެސް ވަނީ ފުރިހަމަކުރެވިފައެވެ.
މި އެއަރޕޯޓް ތަރައްޤީކުރެވެނީ ރަށުގެ ފަޅުން 30 ހެކްޓަރުގެ ބިން ހިއްކައިގެންނެވެ. އަދި ފުރަތަމަ ރޭވިފައިވާ 1200 މީޓަރުގެ ރަންވޭގެ ބަދަލުގައި، މިހާރު ވަނީ 1800 މީޓަރުގެ ރަންވޭއެއް އެޅުމަށް ނިންމާފައެވެ. މި މަޝްރޫޢަކީ ދިވެހި ސަރުކާރުން 231 މިލިއަން ރުފިޔާ ޚަރަދުކޮށްގެން ކުރިއަށްގެންދާ ތަރައްޤީގެ މަޝްރޫޢެކެވެ.
އެއަރޕޯޓުގެ ހިންގުން ހަވާލުކުރެވިފައިވަނީ ރީޖަނަލް އެއަރޕޯޓްސް ކޮމްޕެނީއާއެވެ. މީގެ އިތުރުން، ސަރުކާރުން ވަނީ ފ. އަތޮޅު ނިލަންދޫގައިވެސް އެއަރޕޯޓެއް ތަރައްޤީކުރުމުގެ މަސައްކަތް ފަށާފައެވެ.
މި މަޝްރޫޢުގެ ދަށުން، ސިނާޢީ އަދި އިޖްތިމާޢީ ބޭނުންތަކަށް ޖުމްލަ 48 ހެކްޓަރުގެ ބިން އެމްޓީސީސީން ހިއްކާނެއެވެ. އަދި 3300 އަކަމީޓަރަށްވުރެ ބޮޑު ސަރަޙައްދެއް ހިމާޔަތްކޮށް، ބޮޑުހިލައިން ރިވެޓްމަންޓް ޖެހުމަށްވެސް ވަނީ ރޭވިފައެވެ.
