ސިފައިންނާއި ފުލުހުންގެ އަދަދު އިތުރުކުރުމަށް އަމާޒުކޮށްގެން ހިންގުމަށް ހަމަޖެހިފައިވާ ޤައުމީ ޚިދުމަތުގެ ޕްރޮގްރާމް ފެށުމަށް ސަރުކާރުން ވަނީ ތައްޔާރުވެފައެވެ. މި ޕްރޮގްރާމަކީ ސްކޫލް ނިމޭ ދަރިވަރުންނަށް އަމާޒުކޮށްގެން ހިންގުމަށް ހަމަޖެހިފައިވާ ޕްރޮގްރާމެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި ޕްރޮގްރާމް ހިންގުމަށް ނިންމަވާފައިވާކަން އިޢުލާނުކުރެއްވީ ނަޞްރުގެ ދުވަހުގެ މުވަހުގެ މުނާސަބަތުގައި ބޭއްވުނު ރަސްމީ ޖަލްސާގައެވެ. މި ޕްރޮގްރާމުގެ މައިގަނޑު މަޤްޞަދަކީ ޤައުމުގެ މިނިވަންކަން ހިމާޔަތްކުރުމަށްޓަކައި އަސްކަރީ އަދި ދިފާޢީ ބާރު އިތުރުކޮށް ވަރުގަދަކުރުމެވެ.

ޕްރޮގްރާމް ފެށުމަށްޓަކައި ރައީސް އޮފީހުގައި ނޭޝަނަލް ސަރވިސް ކޯޑިނޭޝަން ސެކްރެޓޭރިއެޓް ސެކްޝަނެއް ވަނީ އުފައްދާފައެވެ. މި ސެކްޝަނަށް ޑެޕިއުޓީ ޑިރެކްޓަރަކާއި އެސިސްޓެންޓް ޑިރެކްޓަރެއް ހޯދުމަށް މިހާރު ވަނީ އިޢުލާނުކޮށްފައެވެ.

ޤައުމީ ޚިދުމަތުގެ ޕްރޮގްރާމްގައި އުމުރުން 16 އަހަރުވެފައިވާ ކުދިންނަށް ބައިވެރިވެވޭނެއެވެ. މި ޕްރޮގްރާމް ހިންގުމަށް ކޮންމެ އަހަރަކު 400 މިލިއަން ރުފިޔާ ބަޖެޓްކުރުމަށް ވަނީ ނިންމާފައެވެ. އަދި މި ޕްރޮގްރާމުގެ ސަބަބުން ސިފައިންގެއަށް 4,000 މީހުންނާއި ފުލުހުންގެ ޚިދުމަތަށް 1,000 މީހުން އަލަށް ގުޅޭނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.

މި ޕްރޮގްރާމާ ގުޅޭގޮތުން ޤާނޫނެއް އެކުލަވާލުމަށްވެސް ސަރުކާރުން ވަނީ ނިންމާފައެވެ. މި ޕްރޮގްރާމުގެ ސަބަބުން ވަޒީފާއެއް ނުލިބި ނުވަތަ މަތީ ތަޢުލީމުގެ ފުރުޞަތު ނުލިބޭ ކުދިންނަށް ރަނގަޅު ތަމްރީނަކާއެކު ވަޒީފާގެ ފުރުޞަތު ލިބިގެންދާނެކަމަށް ބެލެވެއެވެ.