ޝަހީދުންގެ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި މެސެޖުގައި، ޤައުމުގެ މިނިވަންކަމަށްޓަކައި ޖިހާދުކުރި ބަޠަލުންނާއި ޝަހީދުންގެ ހިތްވަރުން ނަމޫނާ ލިބިގަނެ، ވަޠަނަށް އުޖާލާ މުސްތަޤުބަލެއް ހޯދައިދިނުމަށް މަސައްކަތްކުރުމަކީ ދިވެހި ރައްޔިތުންގެ އެންމެ މުހިންމު ޤައުމީ ވާޖިބު ކަމުގައި ވިދާޅުވިއެވެ.

ހަމައެހެންމެ، ނައިބު ރައީސް އަލްއުސްތާޛް ހުސައިން މުޙައްމަދު ލަޠީފް ވެސް ވަނީ ޝަހީދުންގެ ދުވަހުގެ ތަހުނިޔާ ރައްޔިތުންނަށް އަރިސްކުރައްވައި، ޤައުމުގެ ދިފާޢުގައި ޝަހީދުވި އަބްޠާލުންނަށް ސުވަރުގޭގެ މަތިވެރި ނިޢުމަތް މިންވަރުކުރެއްވުމަށް ދުޢާ ކުރައްވާފައެވެ.

ރާއްޖޭގައި ޝަހީދުންގެ ދުވަސް ފާހަގަކުރަން ފަށާފައިވަނީ ހިޖުރީ ސަނަތުން 1400 ވަނަ އަހަރުގެ ޝަޢުބާން މަހުގެ 1 ވަނަ ދުވަހު (މީލާދީ 14 ޖޫން 1980) އެވެ. މި ދުވަސް ފާހަގަކުރުމަށް ސަރުކާރުން ނިންމަވާފައިވަނީ ޕޯޗުގީޒުންގެ އަތްދަށުން ދިވެހި ޤައުމާއި މިނިވަންކަން ދިފާޢުކޮށް، އިސްލާމްދީނުގެ ޙައްޤުގައި ހަނގުރާމަކުރައްވައި ޝަހީދުވެވަޑައިގެންނެވި ހިތްވަރުގަދަ ދިވެހި ބަޠަލް އައްސުލްޠާން ޢަލީ 6 ވަނަ (ޢަލީރަސްގެފާނު) ޝަހީދުވެވަޑައިގެންނެވި ދުވަހަށް ނިސްބަތްކޮށެވެ.

ޝަހީދުންގެ ދުވަސް ފާހަގަކުރުމުގެ މައިގަނޑު މަޤްޞަދަކީ އިސްލާމްދީނާއި ދިވެހިންގެ މިނިވަންކަމުގެ މިނިވަންކަމުގެ ދިފާޢުގައި ޖިހާދުކުރެއްވި ޤައުމީ ބަޠަލުންގެ ހަނދާން އާކޮށް، އެ މާތް ބޭކަލުންގެ ޤުރުބާނީއަށް ޝުކުރުވެރިވުމެވެ. މިފަދަ ދުވަހެއް ފާހަގަކުރުމަކީ ޒުވާން ޖީލުތަކަށް ޤައުމީ ލޯބި އާލާކޮށް، ވަޠަނަށްޓަކައި ޚިދުމަތްކުރުމުގެ ރޫޙު އަށަގެންނެވުމަށް މަގުފަހިވާނެ ކަމެކެވެ.