ރާއްޖޭގެ ލާމަރުކަޒީ ނިޒާމު ހަރުދަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ދުރު ވިސްނުންފުޅުގެ ދަށުން، މާލީ ގޮތުން ކައުންސިލްތައް ބާރުވެރިކުރުމަށްޓަކައި، ފުރަތަމަ ފަހަރަށް 3 ކައުންސިލަކަށް 4 ފަޅުރަށެއް ރަސްމީކޮށް ހަވާލުކޮށްފިއެވެ.

މިކަމާ ގުޅޭ އެއްބަސްވުމުގައި ސޮއިކުރެވުނީ މިއަދު މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގައި ބޭއްވުނު ޚާއްސަ ރަސްމިއްޔާތެއްގައެވެ. މި އެއްބަސްވުމުގައި ސޮއިކުރެއްވީ މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގެ ފަރާތުން ސްޓޭޓް މިނިސްޓަރ އަޙްމަދު މާޒިންއާއި، ކައުންސިލްތަކުގެ ފަރާތުންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު ޢާދަމް ޝަރީފް ޢުމަރު ވިދާޅުވީ، “އަތޮޅު ކައުންސިލަކާއި 2 ރަށު ކައުންސިލަކަށް މިރަށްރަށް މިދޫކުރީ. ކޮންމެ ކައުންސިލެއްގެވެސް އެންމެ ބޮޑު ޒިންމާއަކީ އަތޮޅު ފެންވަރުގައާއި ރަށު ފެންވަރުގައި މަންފާ ލިބޭނެގޮތަށް މިރަށްތަކުގެ ބޭނުން ހިފުން” ކަމަށެވެ.

ފަޅުރަށްތައް ހަވާލުކުރެވުނު ކައުންސިލްތަކަކީ:
1. ދ. އަތޮޅު ކައުންސިލް: ދ. މިނިމަސްގަލި އަދި ދ. ފެންފުށި
2. ރ. އިނގުރައިދޫ ކައުންސިލް: ރ. ނެޔޮ
3. ލ. މާވަށު ކައުންސިލް: ލ. ބޮޑުމާބުޅަލި

މި އެއްބަސްވުންތަކުގައި ދ. އަތޮޅު ކައުންސިލްގެ ފަރާތުން ސޮއިކުރެއްވީ އަތޮޅު ކައުންސިލްގެ ރައީސް އަޙްމަދު ޝާފިޢު، ރ. އިނގުރައިދޫ ކައުންސިލްގެ ފަރާތުން ކައުންސިލްގެ ރައީސް މުޙައްމަދު ޖަލީލް، އަދި ލ. މާވަށު ކައުންސިލްގެ ފަރާތުން ކައުންސިލްގެ ރައީސް އަޙްމަދު މޫސާއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މި ނިންމެވުން ނިންމެވީ، ބިން ކުޑަ ރަށްތަކަށް އިޤްތިޞާދީ މަސައްކަތްތައް ކުރެވޭނެ މަގު ފަހިކޮށްދިނުމާއި، ކައުންސިލްތައް ޒިންމާދާރުކުރުވައި މާލީ ގޮތުން ބާރުވެރި މަސައްކަތްތަކެއް ކުރާ ބަޔަކަށް ހެދުމަށް ކަމަށް ވަޒީރު ޢާދަމް ޝަރީފް ޢުމަރު ވިދާޅުވިއެވެ.

މިއީ ލާމަރުކަޒީ ނިޒާމުގައި މިފަދަ މަސައްކަތެއް ކުރާ ފުރަތަމަ ފަހަރު ކަމަށްވާތީ، މިކަމަކީ ރާއްޖޭގެ ލާމަރުކަޒީ ނިޒާމަށް ގެނެވޭ އެއް ބޮޑު ބަދަލު ކަމުގައި ބެލެވެއެވެ.