ހއ. ދިއްދޫގައި އިމާރާތްކުރަމުންދާ އިސްލާމީ މަރުކަޒުގެ މަސައްކަތް ނިމުމަކާ ކައިރިވެފައިވާކަމަށް ދިއްދޫ ކައުންސިލްގެ ރައީސް ޢަބްދުﷲ ރަޝީދު ވިދާޅުވެއްޖެއެވެ. މި މަރުކަޒަކީ އިސްލާމީ ހައިބަތު ދައްކުވައިދޭ ރީތި އިމާރާތަކަށް ވެގެންދާނެކަމަށް ބެލެވެއެވެ.
ކައުންސިލްގެ ރައީސް ވިދާޅުވިގޮތުގައި މަރުކަޒުގެ ސްޓްރަކްޗަރގެ މަސައްކަތް މިހާރު ވަނީ ނިމިފައެވެ. އަދި މަރުކަޒުގެ ޤުއްބު ބެހެއްޓުމުގެ މަސައްކަތްވެސް ވަނީ ނިންމާލެވިފައެވެ. މިހާރު ކުރިއަށްދަނީ މަރުކަޒު ޒީނަތްތެރިކުރުމުގެ މަސައްކަތްތަކެވެ.
އިސްލާމީ ކަންތައްތަކާބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި މި އިސްލާމީ މަރުކަޒަކީ 1500 މީހުންގެ ޖާގައިގެ ބިނާއެކެވެ. ދެ ފަންގިފިލާގެ މި އިމާރާތުގައި 450 މީހުންގެ ޖާގައިގެ މަލްޓިޕަރޕަސް ހޯލަކާއި، 30 ކުދިންގެ ޖާގައިގެ 4 ކްލާސްރޫމާއި، ދެ ސެމިނަރ ރޫމް އަދި އިސްލާމިކް ލައިބްރަރީއަކާއި އޮފީސް ބައެއް ހިމެނޭނެއެވެ.
މި މަޝްރޫޢުގެ މަސައްކަތް ހަވާލުކޮށްފައިވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑާއެވެ. މަސައްކަތް ހަވާލުކުރެވުނީ 2023 ވަނަ އަހަރުގެ މެއި މަހުގެ ތެރޭގައެވެ. އަދި 540 ދުވަހުގެ ތެރޭގައި މަސައްކަތް ނިންމުމަށް ވަނީ އެއްބަސްވެފައެވެ.
އިސްލާމީ ކަންތައްތަކާބެހޭ ވުޒާރާއިން ހާމަކުރައްވާފައިވާ ގޮތުގައި މި މަޝްރޫޢަށް 50.8 މިލިއަން ރުފިޔާ ޚަރަދުވާނެ ކަމަށް ލަފާކުރެވެއެވެ.
މި އިސްލާމީ މަރުކަޒު ނިމުމުން، ދިއްދޫގެ ރައްޔިތުންނަށް ދީނީ ޢިލްމު އުނގެނުމާއި އިސްލާމީ ޘަޤާފަތް ކުރިއެރުވުމަށް މުހިންމު ވަސީލަތްތަކެއް ލިބިގެންދާނެއެވެ.
ކިޔުންތެރިންގެ ހިޔާލު