ރައީސް ޑޮކްޓަރ މުޙައްމަދު މުޢިއްޒުގެ ތަރައްޤީގެ ސިޔާސަތުގެ ދަށުން ރަސްމާދޫ ކައުންސިލްގެ ޢިމާރާތުގެ ބިންގާ އަޅުއްވައިދެއްވާފިއެވެ. މިއިމާރާތުގެ ބިންގާ އަޅުއްވައިދެއްވީ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާބެހޭ ވަޒީރު އަލްފާޟިލް އާދަމް ޝަރީފު ޢުމަރެވެ.

މި ތާރީޚީ ރަސްމިއްޔާތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޝަރަފުވެރިކޮށްދެއްވިއެވެ. އަދި ދައުލަތުގެ އިސް ވަޒީރުންނާއި، ރަސްމާދޫ ކައުންސިލްގެ މެންބަރުންނާއި، ޑަބްލިޔޫޑީސީގެ އެންމެހައި މެންބަރުންނާއި، ރަށުގެ މުއައްސަސާތަކުގެ އިސްވެރިންނާއި، ގިނަ ޢަދަދެއްގެ ރައްޔިތުން ބައިވެރިވެވަޑައިގެންނެވިއެވެ. މި ދުވަހަކީ ރަސްމާދޫގެ ތާރީޚުގައި ފާހަގަކޮށްލެވޭ ޚާއްޞަ ދުވަހެކެވެ.

ކޮންޓްރެކްޓަރ ފައިނޭންސް އުޞޫލުން ޢިމާރާތްކުރެވޭ 55 ކައުންސިލް އިދާރާގެ ތެރެއިން ރަސްމާދޫ ކައުންސިލް އިދާރާގެ އައު ޢިމާރާތުގެ މަސައްކަތް ކުރިއަށް ގެންދަނީ މެލޭޝިއާގެ “ހެކްސްޓަރ ގްލޯބަލް” ކުންފުނިންނެވެ. މި މަޝްރޫޢުގެ ދަށުން އެހެން ހުރިހާ ރަށެއްގެ ކައުންސިލް އިދާރާތަކުގެ މަސައްކަތްވެސް ކުރިއަށްދަނީ މި ކުންފުނިންނެވެ.