ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މާޅޮސްމަޑުލު އުތުރުބުރީ ރަސްގެތީމުގެ ތަރައްޤީއަށް ކުރަންޖެހޭ މަސައްކަތްތައް މި އަހަރު ތެރޭގައި އަވަސް ދުވެއްޔެއްގައި ކުރިއަށް ގެންދަވާނެކަމުގެ ޔަޤީންކަން އެ ރަށުގެ ރައްޔިތުންނަށް ދެއްވައިފިއެވެ. މި ޔަޤީންކަން ދެއްވާފައިވަނީ، މާޅޮސްމަޑުލު އުތުރުބުރީގެ ބައެއް ރަށްތަކަށް ކުރައްވަމުންގެންދަވާ ދަތުރުފުޅުގެ ތެރެއިން، ރަސްގެތީމު ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސުލްޖުމްހޫރިއްޔާ ވިދާޅުވިގޮތުގައި، މި ސަރުކާރުގެ އަމާޒަކީ ރިޔާސީ ވަޢުދުތަކުގައި ހިމެނޭ ހުރިހާ ކަމެއް މި އަހަރުގެ ތެރޭގައި ފަށައި، ބައެއް މަޝްރޫޢުތައް ނިންމުމެވެ. މިގޮތުން، ރަސްގެތީމުގެ ބަނދަރު މަޝްރޫޢު މި އަހަރު ތެރޭގައި ފެށުމަށާއި، ސްކޫލުގެ ކްލާސްރޫމްތަކާއި ހޯލުގެ މަސައްކަތް ނިންމުމަށް ރާވާފައިވާކަމަށް އެމަނިކުފާނު ހާމަކުރެއްވިއެވެ. އަދި ކުޅިވަރު ވަސީލަތްތަކާއި، ކުނި މެނޭޖްކުރުމާއި، ސިއްޙީ ދާއިރާގެ މައްސަލަތައް ޙައްލުކުރުމުގެ މަސައްކަތްތައް ކުރިއަށް އޮތް މަސްތަކުގައި ފެށޭނެކަމަށްވެސް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ މި ދަތުރުފުޅުގައި، ކަމާގުޅުންހުރި ވަޒީރުންނާއި، ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީ އަދި ރަށުގެ މުއައްސަސާތަކުގެ ވެރިންނާއެކު ފުޅާ ދާއިރާއެއްގައި މަޝްވަރާކުރެވުނުކަން ފާހަގަކުރައްވައި، ކައުންސިލާއި މިނިސްޓްރީތަކާއި ކުންފުނިތައް ގުޅިގެން މަސައްކަތްތައް ކުރިއަށްދާނެކަމަށް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ އެ ވާހަކަފުޅު ނިންމަވާލެއްވީ، މި އަހަރު ނިމޭއިރު މައްސަލަތަކަށް ޙައްލު ލިބި، ރައްޔިތުން އެކަމުގެ އުފާ ފާޅުކުރާ ދަނޑިވަޅުގައި، ރައްޔިތުން އެދިވަޑައިގަންނަވާނަމަ، މަޝްރޫޢުތަކުގެ ނިމުން ފާހަގަކުރުމަށް އަލުން ރަސްގެތީމަށް ވަޑައިގަންނަވާނެކަމުގެ ޔަޤީންކަން ދެއްވަމުންނެވެ.
މި ރަސްމިއްޔާތުގައި، ބޭންކް އޮފް މޯލްޑިވްސްއިން ރަށުގައި އޭޓީއެމް ބެހެއްޓުމުގެ މަސައްކަތް ރަސްމީކޮށް ރަށު ކައުންސިލާ ޙަވާލުކުރެވުނެވެ.
