ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެފައިވާ ގޮތުގައި، ދިވެހިރާއްޖޭގެ މީހުން ދިރިއުޅޭ ރަށްތަކުގެ ތެރެއިން ރ. ވާދޫއަކީ މުޅި ރަށުގެ ހަކަތަ އުފެއްދުމުގައި އިޔާދަކުރަނިވި ވަސީލަތްތައް، ޚާއްޞަކޮށް ސޯލަރ ހަކަތަ ބޭނުންކުރާ ރަށަކަށް ހެދުމަކީ އެމަނިކުފާނުގެ އެދުމެކެވެ.
މި ވާހަކަފުޅުތައް ރައީސުލްޖުމްހޫރިއްޔާ ދެއްކެވީ މާޅޮސްމަޑުލު އުތުރުބުރީގެ ބައެއް ރަށްތަކަށް ކުރައްވާ ތިން ދުވަހުގެ ދަތުރުފުޅުގައި ރ. ވާދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. ރައީސުލްޖުމްހޫރިއްޔާ ވަނީ ރ. ވާދޫ ސިފަކުރައްވާފައިވަނީ އަމިއްލައަށް އިސްނަގައިގެން، ބިނާކުރަނިވި ވިސްނުމަކާއެކު، ގިނަ ކަންތައްތަކެއް ކުރާ ރައްޔިތުންތަކެއް ދިރިއުޅޭ ރަށެއްގެ ގޮތުގައެވެ.
ރައީސުލްޖުމްހޫރިއްޔާ ވަނީ ރ. ވާދޫގެ ރައްޔިތުންނަކީ ވަރަށް ފުޅާ ވިސްނުމަކާއެކު މަސައްކަތްކުރައްވާ، ތަރައްޤީގެ ވިސްނުން ހުރި ރައްޔިތުންތަކެއްގެ ގޮތުގައި ސިފަކުރައްވައި، އެކަމަށްޓަކައި އެ ރައްޔިތުންނަށް ޝުކުރު އަދާކުރައްވާފައެވެ.
މީގެ އިތުރުން، ރައީސުލްޖުމްހޫރިއްޔާ ވަނީ ރަށުގެ ތަރައްޤީއަށް ޚާއްޞަ ކަންތައްތަކެއް ހުރިކަމަށާއި، ރ. ވާދޫއަކީ އަމިއްލައަށް އިސްނަގައިގެން އިޔާދަކުރަނިވި ހަކަތައިގެ ދާއިރާއިން ގިނަ މަސައްކަތްތަކެއް ފަށާފައިވާ ރަށެއްކަމަށް ފާހަގަކުރައްވައި، އެކަމަށް މަރުޙަބާ ވިދާޅުވެ ހިތްވަރުދެއްވާފައެވެ.
ސަރުކާރުގެ އަމާޒަކީ 2028 ވަނަ އަހަރާ ހަމައަށް މުޅި ރާއްޖޭގައި ކަރަންޓުގެ ޚިދުމަތް ދިނުމުގައި، މަދުވެގެން 33.33 އިންސައްތައަކީ އިޔާދަކުރަނިވި ހަކަތަ ބޭނުންކޮށްގެން ދެވޭ ޚިދުމަތަކަށް ހެދުމެވެ. މި އަމާޒާ ގުޅިގެން، ރައީސުލްޖުމްހޫރިއްޔާ ވިދާޅުވެފައިވަނީ ރ. ވާދޫއަކީ މީހުން ދިރިއުޅޭ ރަށްތަކުގެ ތެރެއިން، މުޅި ރަށުގެ ހުރިހާ ހަކަތައެއް، އިޔާދަކުރަނިވި ހަކަތައިން، ޚާއްޞަކޮށް އިރުގެ އަވިން އުފައްދާ ހަކަތައިން ލިބިގަންނަ ރަށަކަށް ހެދުމަކީ އެމަނިކުފާނުގެ އެދުމެއްކަމަށެވެ.
ކިޔުންތެރިންގެ ހިޔާލު