ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ހުވަދުއަތޮޅު އަށް މިހަރު ކުރައްވަމުންގެންދަވާ ދަތުރުފުޅުގައި ހުވަދުއަތޮޅު އުތުރުބުރީ ދެއްވަދޫއަށް މިއަދު ވަޑައިގެން ރައްޔަރުންނާއި ކައުންސިލްއާއި ބައްދަލު ކުރައްވާފިއެވެ. މިބައްދަލުވުން ތަކުގެ ތެރެއިން ކައުންސިލްއިން ހުށަހެޅި ގިނަކަންތަށް ބަޖެޓްގެ ތެރެއިން މިއަހަރު ޖުމްލަ ހައްލުކޮށްދެއްވާނެކަމަށް ރައީސް ވިދާޅުވިއެވެ.

މިއަދުގެ ބައްދަލުކުރެއްވުމުގައި ވާހަކަފުޅު ދައްކަވަމުން އެރަށުގެ ކައުންސިލަރުން ވަނީ ރަށްގިރުމުގެ މައްސަލައަށް ހައްލު ހޯދުމަށް ކުރަމުންދާ މަސައްކަތް މިހާރު ހުއްޓިފައިވާކަން ފާހަގަކުރައްވައި އެކަމަށް ޙައްލެއް ބޭނުންވާކަމުގައި ވިދާޅުވެފައެވެ. އަދި ރައްޔިތުންނަށް ކުރިމަތިވާ ކަންބޮޑުވުންތަކަށް ޙައްލު ހޯދުމަށްޓަކައި ރަށުގެ ޞިއްޙީ މަރުކަޒަށް ޒަމާނީ ވަޞީލަތްތައް އިތުރުކޮށް، ޞިއްޙީ މަރުކަޒު ހޮސްޕިޓަލަކަށް ބަދަލުކޮށްދެއްވުމަށް ކައުންސިލުން އެދިވަޑައިގެންނެވިއެވެ. މީގެ އިތުރުން ބިމުގެ ދަތިކަމަށް ޙައްލު ބޭނުންވާކަމަށާއި އިތުރަށް އާމްދަނީ ހޯދުމަށްޓަކައި ކުރެވިދާނެ ކަންކަމާ ގުޅޭގޮތުން މަޝްވަރާކުރެއްވިއެވެ

މި ބައްދަލުކުރެއްވުމުގައި ވާހަކަފުޅު ދައްކަވަމުން އަންހެނުންގެ ތަތައްޤީއަށް މަސައްކަތްކުރާ (އ.ތ.މ) ކޮމިޓީގެ މެންބަރުން ވަނީ ވޮލީކޯޓެއް ޤާއިމުކޮށްދެއްވުމަށް އެދިވަޑައިގެންފައެވެ.

މިއަދުގެ ބައްދަލުކުރެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ ކައުންސިލުން ފާހަގަކުރެއްވި ކަންކަން ބައްލަވައިދެއްވާނެކަމަށާއި ގިނަކަންތަކަށް މިއަހަރުގެ ބަޖެޓްގެ ތެރެން ހައްލުކޮށް ދެއްވާނެ ކަމަށެއެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ދެއްވަދޫގެ ތަރައްޤީއަށް ކުރިއަށްގެންދާ މަޝްރޫޢުތަކާއި ރައްޔިތުންގެ ހުރި ކަންބޮޑުވުންތައް ޙައްލުކުރުމަށް ސަރުކާރުން ކުރައްވަމުންދާ މަސައްކަތްތަކުގެ އެންމެ ފަހުގެ މަޢުލޫމާތުތައް ކައުންސިލާއި ޙިއްޞާކުރައްވާފައެވެ. ރައީސުލް ޖުމްހޫރިއްޔާ މިރަށަށް ވަޑައިގަތުމުންވެސް ވަރަށް ހޫނުމަރުހަބާއެއް ކިޔައިފައެވެ.

ރައީސްގެ މިދަތުރިފުޅުގައި މިފަހަރު ވަނީ ދެއްވަދޫ ހިމެނޭހެން 8 ރަށަކަށް ވަޑައިގެންފައެވެ. އޭގެތެރޭގައި ގދ ނަޑެއްލާ، ވާދޫ،ފިޔޯރީ، ރަތަފަންދޫގެ އިތުރުން ގއ ގެ ކަނޑުހުޅުދޫ، ނިލަންދޫ، މާމެންދޫ އަދި ދެއްވަދޫ ހިނެއެވެ. މިފަހަރު އިސްކަން ދެއްވާފައިވަނީ މިދިޔައަހަރުގައި ކުރެއްވި ދަތުރުފުލުގައި ވަޑައިނުގަނަވާ ރައްތަކަށް ކަމަށް ރައީސް މިއަދުގެ ޖަލްސާގައިވަނީ ވިދާޅުވެފައެވެ. އަދި ވަރަށް އަވަހަށް އިތުރު ދަތުރުފުޅެއް އެރަށްތަކަށް ކުރައްވަނެކަމަށްވެސް ވިދާޅުވިއެވެ.