ސްރީ ލަންކާގެ އަރުގަމް ބޭގައި ފަތުރުވެރިންނަށް ދިން ނުރައްކާތެރިކަމުގެ އިންޒާރާ ގުޅިގެން މިހާތަނަށް ހައްޔަރުކުރެވުނު މީހުންގެ ތެރޭގައި ދިވެއްސެއް ހިމެނޭ ގޮތަށް ޖުމްލަ 6 މީހުން ހައްޔަރުކުރެވިފައިވާ ކަމަށް ސްރީލަންކާގެ ޕަބްލިކް ސެކިއުރިޓީ މިނިސްޓަރު ވިޖިތަ ހެރަތު ވިދާޅުވެއްޖެއެވެ.

އަރުގަމް ބޭ ސަރަޙައްދުގައި އެކި ހަމަލާތައް ދޭން އުޅޭ ކަމުގެ އިންޓެލިޖެންސް މަޢުލޫމާތާއި، ކޮލަމްބޯގެ މުހިންމު މާލީ ތަންތަނުގެ ފޮޓޯ ނެގުމުގެ ހާދިސާތަކާ ގުޅިގެން މިމީހުން ހައްޔަރުކުރެވުނު ކަމަށް މިނިސްޓަރު ވިދާޅުވިއެވެ.

“މިހާތަނަށް އަޅުގަނޑުމެން ވަނީ 6 މީހުން ހައްޔަރުކޮށްފައި. އޭގެ ތެރޭގައި ދިވެއްސަކާއި 5 ސްރީލަންކާ މީހުން ބަންދުގައި ތިބި އިރު، ތަޙްޤީޤުތައް ކުރިއަށްދަނީ. ނަމަވެސް މިއީ ކޮން ބާވަތެއްގެ ޕްލޭނެއް ނުވަތަ ކޮން ކަމެއް ކުރަން އުޅުނު ބައެއްކަން އަދި ނުބުނެވޭނެ. އެއީ ހައްޔަރުކުރެވުނު 6 މީހުންގެ ފަރާތުން ލިބިފައިވާ މަޢުލޫމާތުން އެފަދަ ނިންމުމަކަށް ނާދެވޭތީ. އެހެންވީމާ، ބޭކާރު ގޮތުގައި މާނަކުރުން ހުއްޓާލަން ޖެހޭ،” ހެރަތު ވިދާޅުވިއެވެ.