އަންނަ އޭޕްރީލު މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި ވާދަކުރާ 2،993 ކެންޑިޑޭޓުންގެ ތެރެއިން އެންމެ ގިނަ ކެންޑިޑޭޓުން ނެރެފައިވަނީ ވެރިކަންކުރާ ޕީއެންސީން ކަމަށް އިލެކްޝަންސް ކޮމިޝަނުން ހާމަކޮށްފިއެވެ.

ކޮމިޝަނުގެ ތަފާސްހިސާބުތައް ދައްކާގޮތުން ކައުންސިލް އިންތިޚާބުގައި ވާދަކުރާ 1611 ކެންޑިޑޭޓުންގެ ތެރެއިން 665 ކެންޑިޑޭޓުންނަކީ ޕީއެންސީގެ މެންބަރުންނެވެ. އަދި އަންހެނުންގެ ކޮމިޓީތަކަށް ވާދަކުރާ 1383 ކެންޑިޑޭޓުންގެ ތެރެއިން 658 ކެންޑިޑޭޓުން ނިސްބަތްވަނީވެސް އެ ޕާޓީއަށެވެ. މި ދެ އިންތިޚާބުގައިވެސް ދެވަނައަށް އެންމެ ގިނަ ކެންޑިޑޭޓުން ވާދަކުރަނީ އެމްޑީޕީންނެވެ. މީގެ އިތުރުން ޖުމްހޫރީ ޕާޓީ، އެމްޑީއޭ، ދަ ޑިމޮކްރެޓްސް އަދި އަދާލަތު ޕާޓީގެ އިތުރުން އަމިއްލަ ގޮތުންވެސް ގިނަ އަދަދެއްގެ ކެންޑިޑޭޓުން މި އިންތިޚާބުގައި ވާދަކުރެއެވެ.

އީސީގެ ނައިބު ރައީސް ޢަބްދުއްރަޙްމާން ޞަލާޙް ރަޝީދު ވިދާޅުވި ގޮތުގައި، ކެންޑިޑޭޓުންގެ ނަންތައް ތަރުތީބުކުރުމަށް ގުރުއަތުލުން މިމަހުގެ 12 ނުވަތަ 13 ހިސާބުގައި ބޭއްވުމަށް ވަނީ ހަމަޖެހިފައެވެ. އަދި ނަން އަނބުރާ ގެންދަން ބޭނުންވާ ފަރާތްތަކަށް ގުރުއަތުލުމުގެ ކުރިން އެ ފުރުޞަތު އޮންނާނެ ކަމަށްވެސް އީސީން ބުނެއެވެ. މި އިންތިޚާބުގައި ޖުމްލަ 294,937 މީހުންނަށް ވޯޓުލުމުގެ ޙައްގު ލިބިފައިވާއިރު، ބައެއް ރަށްރަށުގެ ކައުންސިލް ގޮނޑިތައް، ކުރިމަތިލީ އަދަދު މަދުވުމުގެ ސަބަބުން މިހާރުވެސް ވަނީ އިންތިޚާބަކާ ނުލައި ކަށަވަރުވެފައެވެ.